Mikel Landak irabazi egin du, urtebeteren ostean

TXIRRINDULARITZA. Gaizki ekin zion Mikel Landak (Movistar) sasoiari, lehen egunean, Mallorcako Challengeko lehen etapan erori eta lepauztaia hautsita. Hilabete eta hiru aste geroago itzuli zen lehiara, joan den larunbatean, Milan-Sanremon. Bada, bost egun geroago lortu du murgiarrak sasoiko lehen garaipena, azkena lortu eta urtebetera. Copi eta Bartali Asteko bigarren etapa irabazi zuen atzo. Landa eta Lucas Hamilton (Mitchelton) indartsuenak izan ziren saio aldapatsuan, eta esprintean, arabarra gailendu zen. Sailkapen nagusian, Hamilton da lider, eta Landa laugarren, 22 segundora. Igandean amaituko da proba.

Kataluniako Voltan, berriz, Miguel Angel Lopezek (Astana) irabazi zuen laugarren etapa, itzuliko saio nagusia, eta lider jarri da. Bestalde, klasikoen garaia da udaberria. Atzo World Tourreko Brujas-De Panne jokatu zuten, eta Kirstin Wild (WNT Rotor) nagusitu zen. Gaur, berriz, E3 BinckBank Harelbeke World Tourreko klasikoa jokatuko dute Flandrian.