Preso eriak askatzeko eskatu dute Bilboko zazpi zubitan

BILBO. Gaixo dauden euskal presoak askatu ditzatela eskatzeko, elkarretaratzeak egin zituzten atzo Bilboko zazpi zubitan —Deustuko Zubian, Pedro Arrupen, Zubi Zurin, udaletxeko zubian, Areatzakoan, Merceden eta San Antonen—, eta, bilkuren ondoren, bi martxa atera ziren San Antongo eta Deustuko zubietatik. Udaletxe aurretik pasatuta, Arriaga plazan amaitu zuten bidea.

Bizkaiko tokiko plataformek sustatutako ekinbidea da Ni Zu Bi, atzoko mobilizazioetara deitu zuena. Haren bozeramaileek adierazi zutenez, «eskubide oinarrizkoenak» babestu zituzten atzoko mobilizazioetan: «Tristea bada ere eta gezurra ematen badu ere, gaur egun badira 22 euskal preso gaixotasun oso larriekin daudenak, eta, gezurra badirudi ere, erakunde publikoak dira horien ardura dutenak».

Sare plataformak egitasmoa babestu zuen, eta, ohar batean, dei egin zuen «ezberdinen arteko zubiak» eraikitzera: «Larriki gaixo dauden presoen afera konpontzeko, ezberdinen arteko zubiak eraiki behar ditugu».