BILBO. Larunbatean, burezur bat aurkitu zuen kutxa batean emakumezko batek Castro Urdialesen (Kantabria, Espainia). Ordutik, Guardia Zibilaren ikerketaren hipotesi nagusia izan da burua Bilboko gizon batena izan zitekeela, eta hala baieztatu zuten atzo arrastoei egindako analisiek. Jesus Maria B.R. bilbotarrarena da burezurra; 67 urte zituen, eta apirilaz geroztik zegoen desagertuta. Haren bikotekidea atxilotu zuten asteburuan, eta asteartean espetxera bidali zuen epaileak. 61 urteko emakumezkoa da atxilotua.
Hildakoa Castron bizi zen bikotekidearekin, eta urteak zeramatzan bertan. Hain zuzen, haien bizilagun batek aurkitu zuen burua. Ikerlariei azaldu zienez, atxilotuak berak eman zion kutxa duela hilabete batzuk, Guardia Zibilak haien etxea miatu zuenean gizonaren desagerpena zela eta. Esan zion kutxan «jostailu sexualak» zituela, eta lotsa ematen ziola poliziek ikustea. Bizilagunak, ordea, asteburuan kutxa irekitzea erabaki zuen, usain txarrarengatik susmoa hartuta.
Epaileak sekretupean jarri du auzia. Oraindik ez dituzte aurkitu biktimaren gainerako gorpuzkiak, eta hori da ikertzaileen oraingo kezka nagusia. Guardia Zibila bost egunez aritu da gizonezkoaren etxebizitza miatzen, baina orain ikerketa eremua zabalduko du. Besteak beste, biktimak Samanon (Kantabria, Espainia) zituen lurrak ikertuko ditu haren gorpuaren arrastorik ote dagoen jakiteko.
Castron agertutako burezurra Bilboko gizonezko batena da
Jesus Maria B.R. apirilean desagertu zen. Bikotekidea espetxeratu dute, eta auzia sekretupean jarri dute.
Iruzkinak
Ez dago iruzkinik
Ordenatu