Diru bidegabekeria susmoak Donibane Lohizunen

DONIBANE LOHIZUNE. Jerome Bourrier Baionako prokuradoreak ikerketa bat abiatu du Donibane Lohizuneko (Lapurdi) poliklinikako ustezko diru bidegabekeria argitzeko. Nicole Ithurria Donibane Lohizuneko auzapezordeak dimisioa aurkeztu zuen astelehenean, poliklinikako zuzendaritza berria finantza arloko anomalia batzuez ohartu ondoren. Ithurria izan zen egituraren zuzendaria joan den ekainera arte. 30 urtez zuzendaritzan egon ondotik, ekainean kanporatu zuten, gutxienez 190.000 euroko desbideratzea leporatuta, baina zenbait hedabidek aipatutako iturrien arabera, 1,3 milioi eurora arteko galera izan liteke aferaren iturburuan. Azken urteetan, Lapurdi kostaldeko hiriko finantzez arduratu da Ithurria auzapezorde gisara. Jean François Hirigoien auzapeza «harritua eta nahigabetua» agertu da berriarekin.