Aragones: «Ez uki katalanezko eskola eredua»

BARTZELONA. Murgiltze eredua «argi eta garbi» defendatu nahi izan zuen atzo Generalitateko presidente Pere Aragonesek: «Katalanezko eskola eredua ezin da ukitu». Murgiltze linguistikoa «herrialdearen kohesio sozialerako eta aukera berdintasunerako lagungarri» dela uste du Aragonesek. Horrez gain, katalana defendatzea eta sustatzea «Espainiako Gobernuaren betebeharra dela» gaineratu zuen presidenteak, «Katalunia Espainiako Estatuaren pean dagoen bitartean». «Espainiak babestu beharreko hizkuntza ere bada katalana; horregatik, ezinbestekoa da Pedro Sanchezen gobernua jendaurrean agertzea ahal bezain laster, gure hizkuntza defendatzeko». Aragonesek uste du Kataluniako gizartean «kontsentsu zabala» dagoela katalana hezkuntza sisteman sustatzearen alde; hori dela eta, Espainiako Auzitegi Gorenaren erabakia «kontrako norabidean» doala azaldu zuen atzo: «Katalanaren presentzia murriztu ez, handitu beharko litzateke».