Beste bi andrek salatu dituzte sexu abusuak klinika berean

Momentuz hiru emakumek kontatu dute leku berean eta egun berean antzeko erasoak jasan zituztela

Berria -

2019ko martxoak 21
BILBO. Herenegun jakinarazi zuen emakume batek Bilboko klinika pribatu batean beretaz abusatu zutela astelehenean. Atzo, beste bi andrek salatu zuten gauza bera Ertzaintzan: erietxe berean —Begoña auzoko Virgen Blanca klinikan— eta egun berean eginiko sexu erasoak kontatu dituzte. Poliziak ikerketa bat abiatu zuen arratsaldean, eta, edizio hau ixterakoan, ez zuen zehaztua oraindik hiru emakumeen ustezko erasotzailea pertsona bera ote den.

Aurreneko erasoarekin loturik, atzo iluntzean elkarretaratzea egin zuten Orozkon (Bizkaia). Herri horretakoa da herenegun salaketa jarri zuen emakumea. Kolonoskopia bat egin ondoren eta oraindik ere lasaigarrien eraginpean zegoela, zeladore batek ukituak egin zizkiola azaldu zuen.

Basauriko Baskonia Futbol Eskolako (Bizkaia) entrenatzaile ohiaren kasuari buruz, berriz, pertsona horren kontrako epaiketa lehenbailehen egiteko eta bitartean badaezpadako neurriak hartzeko eskatu du sexu abusuengatik hura salatu duen pertsona batek. «Munstro hori bere biktima batzuengandik ehun metrora baino gutxiagora bizi da», esan du bideo batean. Iazko abendutik, zazpi salaketa jarri dituzte. Martxoaren 12an atxilotu zuten, baina aske dago.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna