ESKUBALOIA. Bidasoak kolpe gogorra jaso zuen atzo. Kolpe gogorra, 22na berdindu zuelako etxean Cangas apalaren aurka —hamalaugarren da sailkapenean—; eta kolpe gogorra, bisitariek azken segundoan sartu ziotelako berdinketaren gola. Horren ondorioz, Irungo taldeak (Gipuzkoa) Asobal ligako bigarren postua gal dezake gaur. Logroñok Alcobendasen (Espainia) irabaziz gero, postu bat egingo du atzera.
Bide eskasagoa darama Anaitasunak. Iruñeko taldeak irabazi egin zituen azkeneko bi partidak ligan, baina atzo galdu egin zuen Huescan (Espainia): 28-26. Nafarrak azken txanpan geratu ziren esku hutsik, 26na baitziren. Sailkapenean, erditik behera jarraitzen dute.
Egoera berean da Zuazo Espainiako Ohorezko Mailan. Barakaldoko taldeak (Bizkaia), hala ere, 27-25 irabazi zion atzo Aula Valladolidi Lasesarren. Bera Bera da liderra. Donostiarrek bi punturen aldea dute Ro'Casarekin, baita haren aurkako gol aldea ere. Zortzi jardunaldi falta dira jokatzeko.
Bidasoak berdindu egin du etxean, Cangasekin
Iruzkinak
Ez dago iruzkinik
Ordenatu