Italiako Familia ministroak ukatu egin ditu sexu bereko pertsonen arteko familiak

ERROMA. Ia hiru hilabeteren ondoren, M5S 5 Izar Mugimenduak eta Lega Nord alderdiak osatu dute, azkenean, Italiako Gobernua, eta izendatu dituzte ministroak. Familia ministro berria Lorenzo Fontana da, Lega alderdi ultrakoa. Elkarrizketa batean esan du sexu bereko pertsonen arteko familiak ez direla existitzen, eta abortua sustatzeko praktiken kontra lan egingo duela. Adierazpen horiek polemika eragin dute Italian. Fontanak adierazi du familia eredu homosexualak ez direla «legez» existitzen. Joan den legegintzaldian, ordea, gisa horretako bikoteak aitortzeko lege bat onartu zuten.