Sam Bennettek irabazi du Giroko hirugarren esprinta

TXIRRINDULARITZA. Sam Bennettek (Bora) Italiako Giroko zazpigarren etapa irabazi zuen atzo Praia a Maren. 159 kilometroko etapa ia bi kilometroko esprint oso luze batekin bukatu zen, eta irlandarrak azken metroetan hartu zion aurrea Elia Viviani(Quick Step) faborito handiari. Sailkapen nagusian ez da aldaketarik egon, eta Simon Yatesek (Mitchelton) beste egun batez eramango du elastiko arrosa. Pello Bilbao (Astana) da lehen euskal herritarra, seigarren postuan, 1.03ra.

Etapa eguneko ihesaldiarekin hasi zen, eta bertan sartu zen Markel Irizar (Trek). Oñatiarrak Davide Bellerini (Androni) eta Maxime Belkovekin (Katuxa) egin zuen ihes zortzigarren kilometroan. 140 kilometro egin zituzten ihesean, tropelak helmugatik bederatzi kilometrora harrapatu zituen arte. Esprinta saihestezina zen, eta Bennett azti ibili zen. Azken metroetan Vivianiren gurpilera jarri eta aurrea hartu zion. Giroko lehen bi esprintak Vivianik irabazi zituen, bere aurkariekin estrategia bera erabiliz. Gaur 203 kilometroko etapa jokatuko dute, Montevergine di Mercoglianoko (1.260 metro) igoerarekin amaituko dena. Hemezortzi kilometroko mendatea da, baina ez oso gogorra.

Bestalde, eta Girotik kanpo, Euskadi-Murias taldeak sasoiko lehen garaipena lortu zuen atzo. Jon Aberasturi izan zen Aragoiko Itzuliko lehen etapa irabazi zuena, Caspen. Ondorioz, hura da lehen liderra. Merezitako lorpena da, taldeak postu on asko lortu baititu aurten, baina garaipena falta zitzaion.