EHU, munduko 400 unibertsitate onenen artean

BILBO. Atzo jakinarazi zuten Shanghaiko Unibertsitatearen aurtengo rankinga: ikastegi horrek munduko unibertsitateak sailkatzen ditu kalitatearen arabera, eta, aurten, Euskal Herriko Unibertsitatea (EHU) lehenbiziko 400 onenen artean ageri da lehenbiziko aldiz. Duela sei urte maila bat beheragoko blokean geratu zen, lehen 401. eta 500. postuen artean.

Shanghaiko (Txina) Jiao Tong unibertsitateak osatzen du zerrenda urtero; sailkapenaren berri blokeka ematen du gero, postua zehaztu gabe. Irizpideen artean daude, batez ere, unibertsitate bakoitzeko ekoizpen akademikoaren eragina eta nazioarteko prestigioa; lehen hamarretatik, zortzi AEBetan daude eta bi Erresuma Batuan. Nekane Balluerka EHUko errektorearen hitzetan, «albiste bikaina» da euskal gizartearentzat: «Ranking honetan posizioetan gora egitea da gure lana egiaztatzeko modurik onenetako bat. Nolanahi ere, ez genuke posizio horretaraino eraman gaituen exijentzia maila jaitsi behar».