BILBO. Europako Batzordeak Espainiako Energia Ministerioari informazio espediente bat helarazi diola azaldu zuen Alvaro Nadal ministroak, atzo, Bilbon, MTE Munduko Turismo Erakundearen kontseilu exekutiboaren bilera han egiteko hitzarmena sinatu ostean. PPren eta EAJren arteko negoziazioen barruan, euskal enpresei argindarraren faktura merkatzeko akordioak eragin du Bruselaren eskaera.
Kataluniako arartekoak jarri zuen salaketa, erabakiak euskal enpresei abantaila ematen dielakoan. Nadalek, ordea, ukatu egin zuen fakturaren aldaketa «estatu laguntza bat» izatea: «Euskal industria babesteko neurri on bat da». Halere, adierazi zuen prebentzio demanda batek tarifa elektrikoaren aldaketa oztopatu dezakeela.
Bide batez, ministroak azpimarratu zuen neurriak aurrera jarraitzeko aurtengo Espainiako aurrekontu orokorrak onartu behar direla. Nadalen arabera, aurrekontu horiek nork babestuko dituen da galdera nagusia. Izan ere, Espainiako Gobernuak EAJren babesa lortu nahi du horretarako.
Aldaketa gertatuko balitz, euskal enpresen argindarraren faktura nabarmen murriztuko litzateke. Egun 30.000 volteko sareei lotuta daude enpresa horietako asko —inguruan potentzia handiagoko sarerik ez dutelako—, eta 28 euro ordaintzen dute megawatt-ordua. Aldaketarekin, 16 euro ordainduko lukete enpresek.
Argiaren merkatzea azaltzeko eskatu dio Bruselak Madrili
PPk eta EAJk itundutako tarifa elektrikoari Kataluniak salaketa jarri ostean iritsi da Batzordearen erabakia
Iruzkinak
Ez dago iruzkinik
Ordenatu