Baskoniak kanpoan hasiko du Euroliga

SASKIBALOIA. Kirolbet Baskoniak etxetik kanpo jokatuko ditu hurrengo sasoiko Euroligako lehen hiru partidak, Zalgiris, Khimki eta Fenerbahceren aurka, hurrenez hurren. Urriaren 4an hasiko du aurreneko fasea, Kaunasen (Lituania), eta apirilaren 10ean bukatuko, Panathinaikosen aurka, etxean. Etxeko lehenengo partida, berriz, urriaren 25ean izango du, Olinpiakosen aurka. Azaroaren 20an, CSKA iragan sasoiko txapeldunaren aurka jokatuko du, etxean, bederatzigarren jardunaldian. Sasoi honetan, ligak lau partida gehiago izango ditu, hamasei taldetik hemezortzira igaro baitira. Titulurako kanporaketak apirilaren 21ean hasiko dira, eta Lauko Finala maiatzaren 22tik 24ra jokatuko da, Kolonian, Alemanian.