Sarekada «justifikatuta» egotea espero du Jaurlaritzak

EPPKren bitartekarien aurkako polizia operazioari buruzko ohar laburra kaleratu du Eusko Jaurlaritzak. «Atxiloketen zehaztasunen berri izan arte itxarongo du Jaurlaritzak balorazioa egiteko», dio oharraren goiburuak. Polizia operazioa «behar bezala justifikatuta» egotea espero duela esan du Iñigo Urkulluren gobernuak, «bakea, ilusioa eta itxaropena eraikitzeko prozesu konplexua bizi garen garai honetan». Guardia ZIbilaren operazioarekin «harrituta» dagoela esan du, eta horri buruz kaleratutako informazioa «nahasgarria» dela. Hargatik, zuhurtziaz eta arduraz jokatzera deitu du. Horrekin batera, «zehaztasun guztiak ezagutu arte» beste baloraziorik ez duela egingo jakinarazi du.