Mugi sisteman sartuko da Renfe, garraioa bateratuz

Berria

2018ko maiatzak 17
DONOSTIA. Gipuzkoako txartel bakarraren sisteman integratuko dira Renfeko aldirietako trenak datozen hilabeteetan. Marisol Garmendia Gipuzkoako Foru Aldundiko Mugikortasun eta Lurralde Antolaketa diputatuak aldundiaren eta Renferen arteko «akordio tekniko» bat iragarri zuen atzo. Sistemarekin bat eginda, aldirietako trenen erabiltzaileek Mugi sistemako deskontu eta tarifa berberak izango dituzte. Renfe integratuta, Mugi sistemaren barruan txertatuko da Gipuzkoako garraio publiko osoa.

Garmendiaren arabera, lau urteko iraupena izango du akordioak, eta urtez urte berritu ahalko da. Alabaina, akordio hori sinatu aurretik hura «aztertu eta onartu» egin beharko dute Espainiako Sustapen Ministerioak eta Gipuzkoako Garraioaren Lurralde Agintzaritzak. Garmendiak azaldu du zenbait xehetasun «tekniko eta ekonomiko» lotzea falta dela.

Akordioaren arabera, bere geltokiak Mugiren erabilerarako egokituko ditu Renfek, eta hileko abonuetan eta urrezko txartelean orain arteko prezioei eutsiko die. Trukean, garraio agintaritzak aldirietako tren zerbitzuaren «oreka ekonomikoa» bermatuko du, Mugiren deskontuei dagozkien galerak berdintzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna