Anaiz Funosas. Bake Bideko presidentea

«Bilbon ikusitako indarra mugarri bat da Madril mugiarazteko»

Frantziaren erabakia «berri ona» izanik ere, presoen aferari «konponbide integrala» eman behar zaiola dio Funosasek. Uste du Espainia «bakartuta» geratu dela orain, eta lanean jarraitu behar dela hura mugiarazteko.
ISABELLE MIQUELESTORENA

Edurne Begiristain -

2018ko urtarrilak 16
Ipar Euskal Herriko ordezkaritzaren eta Frantziako Justizia Ministerioaren arteko lan esparruaren ondorio da presoen gerturatzea. Anaiz Funosasek (Baiona, 1979) uste du Hego Euskal Herrian ere ari direla konplizitateak lantzen.

Parisko gobernua euskal presoak gerturatzen hasiko da asteotan. Nola hartu duzu albistea?

Justizia Ministerioarekin izandako azken bileran sumatu genuen borondate politikoaren baieztapena da. Berri ona da ministerioak ofizialki esatea erabaki duela datozen asteotan lehen hurbilketak egitea.

Azaroan, Frantziak DPS estatusa kendu zien zazpi presori; orain, hainbat preso hurbilduko ditu... Presoen afera konpontzeko norabide egokian doaz erabaki horiek?

Hurbilketa oso inportantea da, baina ordezkaritzaren helburua da presoen auziari konponbide integrala ematea, eta, bide horretan, ezinbestekotzat jotzen dugu salbuespen neurriak bertan behera uztea. Pozik gaude presoak gerturatzeko erabakiarekin, noski, baina Ipar Euskal Herriko ordezkaritzan lan handia egiten jarraitu behar dugu konponbidea bururaino eraman dadin.

Presoen auziari konponbide integrala emateko pauso gehiago eskatzen dituzue.

Bai, noski. Ezingo da konponbide osoaz hitz egin Euskal Herrian euskal preso politikoak baldin badaude. Bake prozesu bat nahi badugu, guztiekin eraiki behar da etorkizuna. Gu hori gogoan hartuta ari gara lanean, eta espero dugu Ipar Euskal Herritik abiatutako bidea baliagarria izatea Madril mugiarazteko.

Uste duzu Frantziak presoak hurbiltzeko pausoa ematea lagungarri izan daitekeela Madril mugiarazteko?

Madrilgo gobernuak egin dituen azken adierazpenen arabera, ezetz ematen du, baina seguru gara joan den larunbatetik Madril bakartuta geratu dela salbuespen neurriekin duen jarreraren ondorioz. Larunbatean Bilbon ikusi zen jendetza, indarra eta borondatea ere bada mugarri bat Madrilgo gobernua mugiarazteko, eta bake prozesuan aktibo positibo bat bilakarazteko. Horregatik, zalantzarik ez dugu lanean segitu behar dugula.

Frantziako Gobernuaren jarrera ez litzateke ulertuko Ipar Euskal Herriko hautetsien eta bestelako ordezkarien lanik gabe. Posible ikusten duzu Hegoaldean antzeko lan esparru komun bat?

Hego Euskal Herrian lan hori egiten ari da. Badakigu Ipar eta Hego Euskal Herriko egoerak diferenteak direla, aliatu politikoak ere desberdinak direla eta gure izaera bera ere desberdina dela... Ipar Euskal Herrian ikasi dugu elkarrekin lan egiten, eta bake prozesu honetan fite ulertu dugu baturik eta gauzak adosturik agertu behar genuela Parisen aurrean. Ipar Euskal Herritik ikusita, iruditzen zaigu Hego Euskal Herria ere ari dela pausoak ematen. Gogoetak ari dira bultzatzen, eta gogoa badago bakearen inguruan batasuna lortzeko eta ahots bakar hori sortzeko. Gu sinetsita gaude hori dela bidea Madrili aldaketa ozen eskatzeko eta konponbide osoaren bidea lantzeko.

Larunbateko manifestazioaren amaieran adierazi zen gizarte aktibo bat behar dela estatuak mugiarazteko. Nahikoa inplikatuta dago gizartea?

Baietz uste dut. Larunbatean Bilbon 100.000 pertsona batu izana oso adierazgarria da, irudia biziki indartsua da, eta erakusten du badela borondate eta gogo bat, jendeak nahi duela bere tokia izan prozesu honetan. Ipar Euskal Herrian aktibazio horretatik igaro gara, eta horregatik gaude gauden tokian. Bada garaia pentsatzeko pieza guztiak batuz gero hobeto funtzionatzen dutela eta horrek aldaketak ekartzen dituela. Konbentzituta nago estatuak ez direla bakarrik mugitzen, mugiarazi egin behar direla.

2018. urtea giltzarri izango da presoen afera konponbidean jartzeko?

Hala behar du. Horrek izan behar da gure erronka. Euskal presoen eta iheslarien auzia konponbidean jarri behar da. Mentalitate aldaketaren urtea izan behar du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna