Ezarian. Zientzia

'Kepler' jaurtitzeko arazoak

Asteartean, 23:23an espazioratu behar zuten 'Johannes Kepler' zamaontzia, baina, lau minutu falta zirela, operazioa etetea erabaki zuten, arazo batzuk antzemanda. Bart 'Ariane-5' suziriarekin batera ISSra abiatzekoa zen

X. Martin -

2011ko otsailak 17
Ariane-5 suziriaren oxigeno likidoaren mailak mugatik gora zeudela ohartzean bertan behera utzi zuten astearte gauean Johannes Kepler zamaontzia jaurtitzea. Kurun, portu espazial europarrean, Guyana Frantsesean, kezka nagusitu zen.

Autobus handi baten neurriak dituen kargaontziak Nazioarteko Espazio Estaziora (ISS) joan behar du askotariko hornidurekin. Gaurgero espazioan behar luke atzo gaueko bigarren saioan (21:50) berriro arazoak egon ez baziren, behinik behin. Jaurtitzea 24 ordu atzeratzea erabaki zuten asteartean. Jean-Yves Gall Arianespaceko presidenteak esan zuenez, ingeniariek antzemandako arazoak konpontzen hasi ziren berehala, eta, haien lanaren arrakastaren arabera, zamaontzi handiak espazioan behar du honezkero.

Transferentziarako ibilgailu automatikoa da Johannes Kepler, ESAk Nazioarteko Espazioa Estaziora bidaltzen duen bigarrena. 2008an, Jules Verne bidali zuen. Horrelako ibilgailuek ez dute astronautarik behar. Kepler hamar metro luze da, eta 4,5 metroko diametroa dauka. Haren itxura bi solairuko autobus baten neurriko zilindroa da. Misioak 350 milioi euroko kostua dauka.

ISSn dauden hiru astronautentzako hornitzeak daramatza. Janariak eta oxigenoa, baita hainbat gai ere esperimentuak egiteko. Horrez gain, 4,4 gas tona daramatza, espazio estazioaren orbita aldatu ahal izateko. ISSren orbita 30 eta 40 kilometro artean igo nahi dute, eta horretarako gasak bultzatzeko duen indarra behar da. Lurraren gainetik 300 kilometro baino gehiagora dago ISS.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna