Ezarian. Zientzia

Espazioko paseoak ISSan, Discoveryren azken egunetan

Steve Bowen eta Alvin Drew astronautek espazioaren hutsa 'botilaratu' dute beste lan batzuen artean

X. Martin -

2011ko martxoak 3
Trafiko handia dago egunotan Nazioarteko Espazio Estazioan (ISS). Discovery iritsi berria da; aurreko astean Johannes Kepler zama ontzi europarra ailegatu zen; duela hamar egun Progres espaziontzi errusiar bat abiatu zen handik, eta Japoniako HTV ISSra kateaturik jarraitzen du. Estazioan dauden sei astronautez gain, Discoveryk beste hainbeste eraman ditu.

Bistan da, mugimendua ez da falta Lur planetatik 350 kilometrora dagoen base handian (futbol zelai baten neurriak ditu eta 375 tonako pisua). Izan ere, Discoveryren misioak, transbordadore beteranoaren azkena berau, jardun bizia eraman du ISSra. Atzo espaziora atera ziren bigarrenez Steve Bowen eta Al Drew. Aste hasieran eman zuten lehenengo espazio paseoa. Mantenu lanak egiteaz gain, Japoniako Message in a botle egitasmoan parte hartu zuten. Hodi berezi batean espazioaren hutsaren zatitxo bat botilaratu zuten. Lurrera ekarriko dute hura, publikoak ikus dezan. Discoveryko astronauten lanik garrantzitsuena, ordea, Leonardo modulua instalatzea da. Al Drew espaziora atera den 200. astronauta da.

Discoveryren azken misioa

Bost hilabeteko atzerapenarekin aurreko otsailaren 25ean espazioratu zen NASAren Discovery transbordadorea; misio gehien egin dituen espaziontzia da Discovery. 1984ko abuztuaren 30ean egin zuen estreinako bidaia espazioara hainbat urtetako eraikuntza lanen ondotik —1970eko abuztuan hasi ziren eraikitzen—.

26 urte eman ditu NASArentzat lanean, ia beti arrakastarekin. Hubble teleskopioa espazioratu zuen; Kibo laborategi japoniarra ere bai; gainera, ISSren azpiegituraren oinarrizko hainbat zati garraiatu zituen. 1998an beste errekor bat hautsi zuen. 77 urteko astronauta bat eraman zuen espaziora: John Glenn. Discovery 352 egunez egon da orbitan eta 246 astronauta eraman ditu 38 misiotan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna