Martxoaren 8 (berri) batean

Bi asteren bueltan bi emakume hil ditu indarkeria matxistak Euskal Herrian; bat Gasteizen, Orion bestea. Ordea, Hegoaldeko hauteskundeen eraginez, hilketek apenas izan duten oihartzunik hedabideetan. Demokrazia patriarkal batean garen seinale? 2003tik, 119 andre hil ditu matxismoak Euskal Herrian. Berriki gertaturiko kasuak aztertu, eta gaiaren zenbait ertzi erreparatuko die Berria FMk, hala nola indarkeria matxistaren errelato ereduari eta morboari. Bestalde: zer esan nahi dute LGTBI siglek? Eta, zertan zen abortuaren auzia orain 50 urte?

Honezkero inor gutxi izanen da enteratu gabea: foru eta udal hauteskundeak izanen dira maiatzaren 28an Hego Euskal Herrian. Eta kanpainak dena hartu du: hormak, irrati solasaldiak, billabesen atzekaldeak… bada, Berria FM ere bai. Hautagai zerrendei so egin, eta hara burura datozkigun galderak: egiazki al da «emakumeen kanpaina»? Eta horrek zer dakar? Politika feministagorik bai? Zuriñe Rodriguez eta Arantxa Martinezekin argitu ditugu horiek. Bestalde: zer gertatu da Vatikanoan? Eta Fronte Polisarioarekin? Eskerrak Kristina Berasaini. Berak badaki.

Gizonentzako antisorgailu berri bat lortzeko urrats garrantzitsu bat egin dute AEBetan eta, albistetik tiraka, kontrazepzioaz aritu gara bosgarren saioan. Zergatik daude gizonentzako antisorgailu gutxiago emakumeentzako baino? Bikote heterosexualetan, nork hartzen du haurdunaldia eragozteko ardura? Aukera gehiago egoteak ekarriko luke ardura banatzea? Ana Galarraga zientzia dibulgatzailearekin eta Ana Uriz ginekologoarekin hitz egin dugu. Horrez gain, Zeledon emakumea izateko aukeraz aritu gara, baita Maiatzaren 1az ere.

Mende erdi bete da Pablo Picasso hil zenetik. Haren omenezko dozenaka erakusketa eta ekinbide antolatu dira han eta hemen, eta Berria FMk ere egin du berea; begirada feministatik. Ezagunak baitira artista kubistak genero ikuspegitik sortzen dituen zalantzak. Jenio bat zelako ideiak sarri tapatu ditu horiek; hemen ez. Haizea Barcenilla arte komisarioaren laguntzarekin landu dugu gaia. Picassoz harago ere bai. Bestalde: zertan da alardearen auzia Irunen? Arantxa Iraolak argitu digu.

Iritzi foruetan aritzen diren zenbait emakumek urtarrilean argitaratutako ‘Irautea iraultzea denean’ artikulua oroitu dugu Berria FMren hirugarren atalean, eta aipatzen direnetan sakondu: aitakeria, arzalpenak, kuotak, grazia izpirik ez duten txantxak... Pilar Kaltzada izan dugu gurean, baina ez bera bakarrik: beste bost ahotsek ere hartu dute parte. Azaltzeko, kontatzeko eta salatzeko. Beste batzuei, aldiz, isil daitezela eskatu diegu.

‘Soilik baietz da baietz’ legearen erreformari heldu diogu Berria FMren saio berrian. Baina ez soilik hari: zigorretara mugatzeaz, ezetz esateko zailtasunez eta baiezko behartuez ere aritu gara. Eta Afganistango andreen ezinez. Eta liburu erreez. Eta beste hainbestez.

Berria FMren etapa berriko lehen saioa Martxoaren 8arekin batera heldu da. Ezinbestean, Emakumeen Nazioarteko Eguna hartu dugu hizpide: izan duen bideaz, haren dimentsioaz eta egunari lotutako erronkez aritu gara. Baita zaintzaz ere —gai hori hartu baitu ardatz mugimendu feministak—, eta urtero egun honen bueltan izaten den zuriketa moreaz.

Orain arte ezagutu dugun azken Berria FM da hau. Berriak segituko du podcast feminista bat edukitzen, baina eraberritzeko atseden hartzea tokatzen da orain. Azken aldirako hasieratik elkarrekin egon diren Intza Alkain, Bea Egizabal eta Maider Galardi F. Agirre podcasteko gidaria aritu dira solasean.

Indarkeria Matxistaren Nazioarteko Egunerako bi egun falta direla, gaur egun erabateko zigorgabetasuna duen bortxa batetaz arituko gara: indarkeria obstetrikoaz. Horretarako, Saioa Baleztena kazetariarekin elkartu gara. Indarkeria horren biktima izateaz gain, gaia asko landu du bai hedabideetan eta baita instituzioekin elkarlanean ere. Ohi moduan entzule batek deitu du, eta amaitzeko ostiraleko mobilizazioen berri emango dugu.

Mugen Gainetik eta Gehitu elkarteekin segitzen dugu hartu-emanean, eta Gaztegehituko Izei Etxeberria gonbidatu dugu 42. saiora. Zientzia Politikoetan graduatua da, eta azken aldian harremanei buruzko gogoetak egiten dabil, bere begiradatik eta beregan eragina duten aldagaietatik abiatuta. Atal honetan, neurodibergentziaz eta asexualitateaz arituko gara besteak beste. Entzule batek ere deitu du eta harreman heterosexualei buruzko hausnarketa utzi digu podcastean.

Laugarren denboraldia estreinatu dugu Berria FMn eta kolaborazio berri batekin gatoz. Saio honetan eta hurrengoan Gehitu eta Mugen gainetik elkarteek duten lankidetzaren bozgorailu izango da Berria. Gaurkoan Julen Gorosabel pertsona trans ez bitarraren bizipen eta gogoetak entzungo ditugu. Eta Ramoni oporretan egon arren, entzule batek deitu du podcastera.

Entzun bi biek esateko dutena.

Ines Osinagarekin egin dugu hitzordua denboraldiko azken Berria FMn. Musikari bezala ibilbide luzea du Osinagak, eta, orain hainbat sorkuntza ditu eskuartean, Mauriziak ez dau inor hil egitasmoa eta Badon proiektua, besteak beste. Emakumeek oholtzan duten espazioaz, beken eta diru laguntzen sistemaz, amatasunaz eta osasun mentalaz jardun gara, besteak beste. Ramonik, berriz, urteko errepasoa egin du bere tartean.

Ezin zuen bestela, eta saio honetan Emakundek Berriari emandako sariaz arituko gara. Maiatzaren 9an  Bilboko sari banaketan egon ostean, Maite Asensio Berriako kazetariarekin eta Elene Barandiaran Berriako barne antolaketa arduradunarekin solasean aritu ginen kazetaritza feministaz, egunkariak egindako urratsez eta betetzeko dituen erronkez, eta beste hainbat kontuei buruz. Umorean, Lohitzune arituko da.

Bularreko minbiziaz arituko gara Berria FMren saio berrian. Bularreko minbiziaz, baina ohikoa ez den begirada apurtzaileago batekin. Sandra Barkaiztegi eta Elena Guinea dira gonbidatuak, biek dute bularreko minbizia, eta Inurri elkarteko kideak dira, eta eritasunaren eta eriaren estereotipoak begirada feministatik aztertu dituzte: burusoiltasuna, sexualitatea, gaixo-itxura eta titi bakarrak, bestek beste.

Saio honetan gerrari eta gatazka politikoei begira jarriko gara. Ez edonolako ikuspegiarekin, ordea: Ukrainan gertatzen ari dena hari eroale gisa hartuta, bidaia are luzeago bat egingo dute Maddi Ane Txoperena,k Ane Irazabalek eta Amagoia Mujika Tolaretxipik; Poloniako mugatik Bielorrusiara, handik Lesbosera, hortik Kongoko Errepublika Demokratikora... Hori guztia gorputza erdigunean jarrita: kazetariarena, emakumearena, amarena, gaztearena...

Musak ugari, baina emakume artistak zerrendatzea kostatu egiten zaigu oraindik. Ez da ez daudelako, ikusgai ez daudelako baizik. Baina horretaz gain, arte sistema osoa begirada feministatik aztertzea ezinbestekoa da gertatzen diren botere logikak ulertzeko. Horretarako, bidelagun ditugu saio honetan Aintzane Usandizaga kultur bitartekaria eta idazlea eta Haizea Barcenilla EHUko irakaslea eta komisarioa. Umorean, Ramoni izango da.

Ana Galarraga zientzia dibulgatzailea eta Elhuyarreko kidea da Berria FMren hirugarren denboraldiko bostgarren saioko gonbidatua. Harekin hitz egin dugu zientziaren ezaugarri patriarkalez, koronabirusaren azken orduez eta hartu diren zenbait neurrien funtsaz. Pandemiaz eta sindemiaz ere aritu gara. Umorean, berriz, Ramoni izango dugu.

Eliteko kirolariak dira, baina ez dira profesionalak, eta horrek eguneroko bizimodua zailtzen die emakume kirolari askori. Horietako batzuekin batu gara gaiari buruz hausnartzeko. Berria FMko saio honetan Xubane Uribarrena arraunlariak, Maya Lespielle errugbilariak, Miriam Arrillaga pilotariak eta Ainhoa Tirapu futbol jokalari ohiak egin digute bisita. Umorean Lohitzune aritu da.

Urtemuga dugu Berria FMn, orain bi urte sortu bai genuen podcasta, indarkeria matxistaren aurkako egunaren bezperan. Gaurkoan ere hortaz arituko gara, baina ez hortaz soilik: Maider Barañano Euskal Herriko Neska Gazteetako kidea izango da kolektiboaren nondik norakoak azaltzen eta azken aldian landu dituzten hainbat proiekturen berri ematen. Umorean, serio, Ramoni arituko da eta biharko mobilizazioak ere jasoko ditugu saio honetan.

"Bakea ez da existitzen, feminismoa bat". Lelo hori behin eta berriro errepikatu da azken hamar urteetan, euskal gatazkaren ondorioen analisiak eta horien kudeaketak feminista izan behar duela aldarrikatzeko. 2011ko urriaren 17an Aieteko Konferentzia izan zela gogoratuz, prozesu horretan presente izan ziren Nekane Alzelai eta Rebeka Ubera izan dira Berria FM podcasterako solasaldian. Beraien bizipenetik abiatuta  "bakea", "gatazka" eta "konponbidea" moduko kontzeptuez gogoeta egin dute. Umorean Lohitzune izango da.

Hirugarrenez, bueltan da Berria FM, eta lehenengo atal honetan zinema industriara begira jarriko gara. Lara Izagirre zinema zuzendariarekin egin dugu elkarrizketa sakona. Nora filma zinema aretoetan estreinatu berri du, eta Hemen emakume zinemagileen elkarteko zuzendaria da. Ikuspegi horretatik aritu gara filmak egiteko moduez, zinema jaialdiez, emakumeen parte hartzeaz, eta beste.

Denboraldiko azken saioan GASaz arituo gara: Gurasoen Alienazio Sindromeaz. Zehazki Irune Costumero izango da saioan, bere bizipenak kontatu eta ustezko sindrome horri buruzko azalpenak emateko. Epaiketa osteko balorazio bat ere egin du podcasterako. Gaia ironiaz landu du Lohitzunek, eta puntua Maite Asensio Lozano kazetariarena da.

Klasea eta feminismoa. Kapitalismoa eta heteropatriarkatua. Genero auzia eta klase borroka. Bolo bolo dabil gaia. Izatez, historian zehar hainbatetan errepikatu den gaia izan da: zein doan lehenago, zein zapalkuntzak eragiten duen bestea, nola sortu aliantzak. Horri guztiari buruz hitz egiteko Maddi Isasi eta Nadia Perez gonbidatu ditugu saiora. Lehena Aiaraldeako mugimendu feministako kidea da eta Tubacexeko lan erregulazio espedienteen harira, aliantzan aritu dira bertako langileekin. Perez, berriz, Itaia emakume sozialistek antolakundeko kide da.

Ez da gai berria, baina azkenaldian hizketagai dira maitasun erromantikak eta harreman sexoafektibo eredu konkretuek izkutatzen dituzten indarkeriazko egoerak. Horiek aztertu ditugu Zuriñe Rodriguez kazetari eta ikerlariarekin, baina harago ere begiratu dugu eta plazeraren hamaika txoko arakatu ditugu Laura Muelas de Ayala antropologoarekin. Umorez aritu da Lohitzune, eta puntua Maddi Ane Txoperenarena da.

Urtebete joan da koronabirusaren ondorioz itxialdia agindu zutela, eta oraindik ere pandemiaren eraginak bizi ditugu. Horri begiratuko diogu 27. Berria FM saioan. Batetik, Nafarroako Berdintasun Institutuak konfinamenduan andreek izandako bizipenei buruz egindako ikerketaz solastuo gara Ainhoa Nievarekin. Clara Wolframek, berriz, Pasaiko emakumeek pandemian izandako bizipenak azalduko dizkigu. Umorean Ramoni, eta puntua Amaia Ramirez de Okariz kazetariaren kontu.

Espainiako Gobernua ontzen ari den Trans Legeari buruz arituko gara 26. podcastean. Errepaso bat egingo dugu aurrena: Euskal Herrian trans egoeran dauden pertsonek zein nolako prozeduretatik pasatu behar dira gaur egun? Hego Euskal Herrian gaur egun nolakoa da araudia? Lege horrek zein ondorio izan ditzake? Azken horri buruz aritzeko Kattalin Miner idazle eta mugimendu feministako kide eta Aitzole Araneta berdintasun teknikaria eta trans aktibista izango dira saioan. Lohitzunerena da umore tartea, eta puntua, Maider Galardirena.

Urtarrilaren lehenean indarrean jarri zen Hego Euskal Herrian guraso direnentzako hamaseina asteko baimenak erregulatzen dituen legea. Ika-mika piztu da, ordea: emakumeek baimen luzeagoa behar dute? Zergatik ezin da eskualdatu? Zergatik da baimena norberaren soldataren araberakoa? Zer gertatzen da bikote edo familia ez heteronormatiboekin? Horri buruz iritzia galdetu diegu Edu Portillo Najerari eta June Fernandezi. Ramoni itzuli da oporretatik eta puntua Berriako Oihana Elduaien kazetariarena da.

Urteko azken Berria FM saioan Galdakaora joan gara, Sormene sortzaileen plazan dagoen giroa arnastera. Bertan, J Martinako Kattalin Barcenarekin, Kai Nakaiekin eta Haizea eta Ningrarekin egin dugu solasaldia: zer den gazte eta euskaldun gisa sortzea, zer emakume bezala oholtza hartzea, zein garrantzia duen reggetoia, trapa, rapa eta hip hopa feminismotik kantatzea... Eremu librean dantzan arituko da Lohitzune eta Amaia Igartuarena da puntua.

Datorren larunbatean Euskal Herriko Emakume Abertzaleen VIII. Topaketa feministak izango dira, eta horren gainean arituko gara 23. Berria FM saioan. Iratxe Retolazarekin eta Idoia Zengotitabengoarekin dekolonialismoaz solastuko gara, eta Amaia Zufia Bilgune Feministako bozeramaileak jardunaldien nondik norakoak azalduko ditu. Puntua Maider Galardi F. Agirre kazetariarena da, eta umorearen atala Ramonik egin du.

Gaurkoan bi efemeride gurean: urtebete da BerriaFM sortu zela, eta urtero moduan azaroaren 25a dugu gaur, indarkeria matxistaren aurkako eguna. Bi horien bueltan arituko gara podcast saioan: Leire Grove Bilboko mugimendu feministako kideak aurtengo aldarrien berri emango digu, eta bestetik podcasta osatzen duten Araiz Mezansa eta Lohitzune —Intza Alkainekin— izango ditugu solasean. Puntua Amaia Ramirez de Okariz Kortabarriarena da.

Zaintza lanen garrantzia agerian gelditu zen koronabirusaren lehen olatuan, eta hainbat eragilek eskatu zuten lan horiek denak ikusgai egiteko. Bigarren oldarraldia heldu denerako, ordea, sektore horretan lanean ari direnek salatu dute ez  direla baldintzak hobetu, eta bere horretan segitzen dutela lan baldintza prekarioek. Saio honetan Maitelan kooperatibako kide batekin izango gara, baita erresidentzietako langile batekin ere. ELAk azaroaren 17rako deitutako zainta greba ere mintzagai izango dugu.

Ikus-entzunezko industrian lanean diren andreekin osatu dugu 20. podcasta. Tessa Andonegi aktoreak Hemen proiektua aurkeztu du elkarrizketan, eta eremu horretan lanean ari diren andreen egoeraz eta bizi dituzten oztopoez gogoeta egin du. Bestalde, emakume izateaz gain, gazte ere badiren hiru andreek eman dute industriaren gaineko beren iritzia: Jone Laspiur aktoreak, Ainhoa Gutierrez zuzendariak eta Maren Gonzalez programatzaileak. Lohitzuneren umore tartea eta Nagore Arinen puntua ere badira saioan. 

Pandemia lehertu denetik gora egin du telelanean jarduteko aukera. Hasieran, kontziliaziorako aukera eman zezakeenaren ustea zabaldu zen, baina orain, hainbat ikerketek ondorioztatu dute andreengan are zaintza lanen zama areagotu egin dela. Horri buruz aritukk gara oraingoan Matxalen Legarreta, Amaia Astobiza eta Nora Salbotxekin.

Hilabete da Eusko Jaurlaritza berria osatu zenetik, baina orduan hartutako zenbait erabakik, oraindik ere arrabotsa sortzen dute. Tartean da Emakunde lehendakaritzatik atera eta gizarte gaien sailaren pean kokatzea.

Euskal kultur sorkuntza eta kritika feminista uztartu dituzte UEUk eta EHUk graduondoko batean. Lehen ikasturteari amaiera emateko, jardunaldiak egin zituzten joan den asteburuan, Eibarren. Historiografiari begirada feminista txertatu eta hainbat sorkuntza diziplinatan emakumeek egindako lanak argitan eman dituzte; kultur ekoizpenei ikuspegi feministatik nola begiratu aztertu dute; eta kultur kudeaketaz ere aritu dira, sexu-genero markek  prozesu horietan duten eraginaz hausnarteko. Horren guztiari buruz arituko gara saioan, jardunaldietan parte hartutako hizlari eta entzuleekin.

Sexu askapenaren eguna da datorren igandean, eta sasoiko azken podcasterako hiru belaunalditako lesbianak elkartu ditugu mahai inguruan: Pilar Mendibil Pilon, Biki Pozo eta Eva Perez. Bakoitza bere garaiaren eta adinaren talaiatik aritu da solasean, baina hiruek azpimarratu dute lesbianen ikusgaitasunaren eta auziaren politizazioaren beharra. Lohitzune eta Ramonik elkarrekin eman diote agurra BerriaFMri, eta Irene Arrarats Berriako euskara taldeko koordinatzaileak jarri du puntua.

Euskal Herriko biztanleen %8 soilik bizi arren, hilketa matxisten %20tik Lapurdin izaten dira. Joan den maiatza hasierakoko hilketa ere aztertzen ari dira; suizidio adostua izan zen hala hilketa matxista zehazteko. Datuen atzean dagoena aletuko dugu saio honetan Nora Arbelbide kazetariarekin, eta Ipar Euskal Herriko mugimendu feministako kideek azalduko digute zertan den orain aldarria eta zein urrats egin diren orain arte. Oihana Teyseyre eta Joana Ibargarai Baionako delegazioko lankideek jarriko dute azken puntua.

Koronabirusaren krisia lehertu denetik asko hitz egin da adineko herritarren inguruan, baina gutxitan hartu dute ahotsa haiek. Zahar etxeetako kudeaketaz harago, zahartzeko ereduen eztabaidari, eta adin-tarte horretako aldarrikapenei apenas egin zaie kasu. Mariluz Esteban antropologoarekin eta Elixabete Garmendia kazetariarekin aritu gara horren inguruan solasean, ikuspegi feminista ardatz. Lohitzunek umore tartea osatu du eta Arantxa Iraola Berriako kazetariak, berriz, puntua.

Konfinamenduak eta “normalitate berriranzko” bideak agerian utzi du, besteak beste, familia eta bikote egitura normatiboek pisua dutela, baita gizartearen iruditerian garrantzia handiagoa hartu dutela lagunarteko sareek baino. Bada, ordea, ohiko moduetatik kanpo bizitzeko hautua egina duenik.

Konfinamenduak buru osasunean izan dezakeen eraginez ohartarazi dute hainbat adituk asteotan, eta gai horri helduko diogu BERRI FMren saio berri honetan. Batetik, Eider Iruretagoiena psikologo feministarekin egin dugu elkarrizketa, eta, bestetik Aintzane Muguruzak kontatu digu zer den autismoa duen nerabe baten ama gisa konfinamenduari aurre egitea. Umore puntua Lohitzunek jarri dio saioari.

Koronabirusak osasun arloan ez ezik, gizarteko beste zenbait eremutan ere eragin du. Gainera, etxeetan bakartzeak agerian utzi ditu herritar batzuen eta besteen arteko diferentzia sozioekonomikoak. Desberdinkeria horiei aurre egiterik egongo al da konfinamenduaren ostean?

Hamargarren Berria FM saioa dugu hau. Aurrekoaren moduan, eta konfinamenduak hala behartuta, etxetik eginda, baina gainontzekoen eran, gaiei ikuspegi feministatik heltzeko determinazioz. Koronabirusaren krisia izango dugu mintzagai gaurkoan baina, batik bat, zaintza arloan sortutako arrakalei erreparatuko diegu: Josebe Iturrioz mugimendu feministako kideak sortu berri duten lan mahai teknikoaren xehetasunak emango dizkigu, Lohitzunek begirada zorrotzarekin egingo du egungo egoeraren analisia, zahar egoitzetako bi langile izango ditugu gurekin, eta Maite Asensio Berriako kazetariak jarriko dio puntua saioari.

Hamaika analisi egin litezke koronabirusak sortutako egoera sozial, ekonomiko eta psikologikoen inguruan, baina Berria FMn ikuspegi feministatik helduko diogu gaiari. Zein zen gure egunerokoa orain bi aste? EHUko garbitzaileak greban ziren lan baldintzak hobetzeko, baina, orain, lanera itzuli behar izan dute denek, nahiz eta ez dieten aldarrikapenei uko egin. Nola egin diote aurre egoerari saltzaile eta zaintzaileek? Nola antolatu dira zaintza eta babes sareak hainbat herri eta auzotan? Zergatik hil dituzte hiru emakume astebetean, indarkeria matxistaz?

Martxoaren 8a gertu dela, zortzigarren saioa izango dugu Berria FMn. Horren harira, datorren igandeko mobilizazio nagusien errepasoa egingo dugu, eta, Euskal Herrira etorrita, euskararen eta feminismoaren bidegurutzean jarriko dugu arreta. Lorea Agirre eta Idurre Eskisabelekin Trikua esnatu da liburuari buruzko solasaldi bat egingo dugu, Lohitzunek gogoeta, eta Maialen Berasategik azken puntua jarriko dio saioari.

Azken orduko albisteak landuko ditugu Berria FMren 7. atalean: emakume futbolariek beren baldintzak hobetzeko sinatu berri duten akordioaz arituko gara. Ainhoa Azurmendi kirol teknikari eta adituarekin izango gara, baita Ainhoa Tirapu Athleticeko jokalariarekin eta Iraia Iparragirre Realekoarekin ere. Ramoniren bozgorailua eta Ainara Arratibel BERRIAko kirol saileko kazetariaren puntua ere ez dira faltako.

Udaberria iragartzen duten hainbat erritu eta ohitura egiten dira Euskal Herrian otsailean. Horiei buruz arituko gara Berria FM-ren seigarren atalean. Maggi Bullen antropologoak azalduko du nolakoa izan ohi den emakumeen parte hartzea halako tradizioetan, Lohitzunek Santa Agedaz hitz egingo digu, eta Makeako libertimenduan eta Zubietako eta Iturengo inauterietan ari diren hiru emakumeren iritzia bilduko dugu. Maddi Ane Txoperena kazetariak jarriko dio azken puntua saioari.

Datorren ostegunean, hilaren 30ean, greba orokorra izango da Hego Euskal Herrian, “lan, pentsio eta bizitza duinen alde”. Greba hori babestu edota bultzatzen duten hiru kolektibotako kideekin izan gara Berria FMren bosgarren saio honetan: Ana Mezo Onekako kidearekin, Naia Torrealdai mugimendu feministako kidearekin eta Maialen Aranburu Eskubide Sozialen Gutuneko ordezkariarekin. Hirurek grebaren analisi feminista egin dute, eta grebara joateko arrazoiak genero ikuspegitik aletu. Umorezko tartean, Ramonik zaintzaren gaia jarriko du mahai gainean, eta Irune Lasa BERRIAko kazetariak jarriko dio puntua saioari.

Espetxeari eta bertan preso dauden emakumeei buruz arituko gara laugarren saioan. Oihana Etxebarrieta eta Maria Ruiz ikerlariek argitaratu berri duten Argi izpiak txarrantxen artean liburua aurkeztuko digute. Espetxe sistema azaldu, eta barruan preso diren emakumeen eguneroko praktika erresistenteei buruz hitz egingo dute. Eta, mugak hautsiz, Itziar Moreno euskal presoak elkarrizketa eskaini digu Roanneko espetxetik, Roazhongora lekualdatu aurreko egunetan. Edurne Begiristain BERRIAko kazetariak emango dio amaiera saioari.

Berria FMren hirugarren saioan bertsolaritzaz arituko gara. Ikuspegi feministaz helduko diogu gaiari. Lehenik, Miren Artetxe bertsolari eta ikerlariarekin arituko gara solasean, Ane Labakarekin batera argitaratu berri duen Bertsolaritza feminismotik (bir)pentsatzen liburuaren inguruan. Ondoren, Gipuzkoako Bertso Txapelketako finalaren erraietara sartuko gara, eta, hain justu, horren inguruan gogoeta egingo du Miren Garate BERRIAko kazetariak, saioa ixteko.

Irene Arraratsek Simone de Beauvoirren 'Bigarren sexua' itzuli berri duenez, gaurko saioan harekin hasi, eta aurrera segituko dugu Miren Amuriza, Lucia Baskaran eta Mari Luz Esteban idazleekin, Durangoko Azokan liburu bana izango baitute. BERRIAko langile eta Eskafandrako kide Ainara Lasak, berriz, puntua jarriko dio podcastari.

Indarkeria matxistaren aurkako eguna dela eta, bortxakeria horren ondorioez eta aurre egiteko estrategiaz arituko gara. Horretarako, Josebe Iturrioz irakasle eta militante feminista, eta Maite Asensio Lozano eta Oihana Elduaien Uranga BERRIAko kazetariak izan ditugu gurekin.