2020. urteak emandakoari gainbegiratua

Twitterren ibiltzen baldi bazara, agian ikusiko zenuen Izkander Fernandezek galdetegi berezi batzuk egiten dituela hainbat urtetako diskorik onenak zein izan diren hautatzeko. Top zerrenda horietan ageri diren lan ezagunez, ezusteez eta joerez aritu da Dunbala podcastean.

Ez da erraza izenburuko galderari erantzutea, baina Eneritz Furyakek eta Jagoba Salvadorrek badituzte urteak ekarriko duenari buruzko aurreikuspen batzuk. Orain arte ezagututako aurrerapenen bidetik, proposamen berri batzuez aritu dira; zerrenda «nahiko gaztea» osatu dute, azkenerako.

Gauza askori buruz hitz egiteko aukera eman die aste honetako gonbidatuak Jagoba Salvadorri eta Eneritz Furyaki: Haritz Harregi teknikaria ekarri dute 'Dunbala' podcastera. Haren ibilbideari buruz jardun dute. Musikari aritu da zenbait taldetan; besteak beste, Sen pop-rock taldea sortu zuen 1999an, eta Delirium Tremensekin biran dabil orain. Gainera, musika estudio bat ere badu, eta teknikari aritzen da bertan zein zuzeneko emanaldietan.

Olaia Inziartek bere estreinako diskoa atera du: 'Lehengo lepotikan burua'. Hari buruz hitz egin du Jagoba Salvador eta Eneritz Furyakekin.

2023ko lehen saioan, Tibalt Alberdi elkarrizketatu dute Jagoba Salvadorrek eta Eneritz Furyakek. Gitarra euskaraz eduki sortzailea da Twitchen eta Youtuben, eta bere proiektuaren eta berri eman du. Urteko lanik gogokoenen zerrenden harira, iazko zenbait kanta ere izan dituzte hizpide.

Durangoko Azokaren 'olatua' pasatuta, hari begira jarri dira berriro Eneritz Furyak eta Jagoba Salvador, beste sosegu batekin, aurtengoak ekarri duenaren balantze bat egiteko. Horretarako hitz egin dute Andres Kamio 'Jitu' Elkarreko musika arduradunarekin, Maite Larburu musikari eta Zart kolektiboko kidearekin eta Mikel Amundarain Oso Polita diskoetxeko kidearekin.

Eneritz Furyakek eta Jagoba Salvadorrek idazleek idatzitako hitzak dituzten kantuen zerrenda bat egin dute saioan, aurten kaleratu diren eta Durangoko Azokan egon diren diskoekin. Honako musikari hauek aipatu dituzte: Eñaut Elorrieta, Ines Osinaga, Anonyme Popular, Neomak, Niña Coyote eta Chico Tornado, Txost! eta Don Inorrez.

Oraingoan ere Bizkairari begiratu diote Jagoba Salvadorrek eta Eneritz Furyakek. Maria Rivero elkarrizketatu dute, joan den astean egin zuten BEST Bizkaiko Emakume Sortzaileen Topaketari buruz. Biltzeko beharra zutela nabarmendu du Riverok, eta uste du topaketak islatu zuela kontzientzia hartzearen «iraultza». Gainontzean, berritasunek ere badute beren tokia podcastean: Akaleia, Myotones, D'Capricho eta Ane Zugaza musikarien lanek, hain zuzen.

Bilboko Espora espazioa ezagutzen? 'Entzungunea' deitzen diote haiek. Mikel Vega eta Ibon RG kideek azaldu dute zer den: Larraskituk utzitako hutsunearen gainean sortu dute, entzute aktiboa lantzeko asmoz. Proiektuaren atzeko gogoetez eta datozen asteetako programazioaz aritu dira hizketan.

Balio Dute kolektiboak Kutixik jaialdia antolatu du Donostian azaroaren 5erako, «tokiko eszena» sustatzeko asmoz. Sei talde eta bakarlari ariko dira: Gilda, Joseba B. Lenoir, Lumi, Mihise, Muare eta Neu Troia. Beñat Urteagak kontatu ditu xehetasunak, Mihise taldeko eta Balio Dute kolektiboko kideak. Bestalde, Durangoko Azokako Ahotsenean ariko diren talde batzuen berritasunak errepasatu dituzte saioan.

Julen Basterraren 'Jardun4ldi' lana hartu dute hizpide Jagoba Salvadorrek eta Eneritz Furyakek: gitarra klasikoarekin grabatutako disko bat da, laborantzan inspiratutakoa. Solasaldi luze batean aletu dituzte lan berezi horri buruzko xehetasunak. Horrez gain, Lvnerren, Haraten eta Goxua'n Saltsaren berritasunak ere errepasatu dituzte.

Udako etenaldiaren ondoren bueltan da Jagoba Salvador eta Eneritz Furyak-ek gidatzen duten saioa. Atal honetan Bazka taldeko Erik Berganza izan dute gonbidatu. Izan ere, ekainean lehen diskoa plazaratu zuen Estricalla taldeko kideek eta Galder Izagirrek (Dut, Kuraia, Berri Txarrak) osaturiko banda berriak, eta urrian kontzertuak ematen hasiko da. Horrez gain, Orbel eta Txopet taldeak ere hizpide izan dituzte, besteak beste.

"Bezperen dirdira" diskoa kaleratu zuenetik Lumi taldea elkarrizketatzeko abagunearen zain egon dira Jagoba Salvador eta Eneritz Furyak, biziki interesgarria iruditu baitzaie Ziburuko bikoteak grabatu duen bigarren lan luzea. Hortaz, Nahia Zubeldia eta Manu Mathys taldekideekin solasaldi luze eta mamitsua izan dute ikasturte honetako azken atalean. Horrez gain, argitaratu berri den Mikel Laboa eta Artze anaien "Ikimilikiliklik" ikuskizunaren zuzeneko grabazioa hizpide izan dute.

Tolosako Bonberenea gune autogestionatuaren baitan sorturiko Bonberenea Ekintzak zigiluak 20 urte egin ditu. Bi hamarkada horietan ehundik gora disko argitaratu ditu eta plataforma garrantzitsua bilakatu da euskal diskogintzan. Urtemuga ospatzeko 14 talde bildu dituen jaialdi handia antolatu du eta horretaz guztiaz hitz egiteko Patxi Muñoa Bonbereneako kidea gonbidatu dute. Horrez gain, MICE, Gilda, Bonberenea Txaranga eta Kuraiaren kantu bana entzuteko parada izan da.

Hilaren hasieran kaleratu du Habi taldeak lan berria, 'Helmuga'. Lau kantuz osaturiko EPa da, Elkar diskoetxeak biniloan argitaratua, eta dagoeneko kontzertuetan aurkezten ari direna. Horretaz hitz egiteko Yeray Gascon abeslari eta gitarrista elkarrizketatu dute atal honetan, eta ohi bezala, saioaren amaieran kantu bat aholkatzeko eskatu diote. Horrez gain, Bihar eta Birkit-en abesti bana entzun eta hizpide hartu dute Jagoba Salvador eta Eneritz Furyakek.

Aste honetako albiste nagusietako bat izan da Ødei rap abeslariaren bakarkako lehen diskoaren argitalpena. 2zio taldeko kide ohiak bere lanaren gaineko ardura osoa hartu du 'Terapia' izeneko diskoan, hala abestien konposizioarena nola ekoizpenarena. Horretaz mintzatu da luze eta zabal Jagoba Salvador eta Eneritz Furyakekin. Horrez gain, Maraca Diabloren disko berria eta Zazkel taldearen agurra aipagai izan dituzte.

Apirilaren 1ean kaleratu zuen Peru Galbetek bere lan berria. "Beiratu" du izenburu, eta hitz joko bat planteatzen du begiratzearen eta zerbait beira bihurtu eta distira ematearen artean. Bakarkako lana da Galbeterena baina disko honetan inoiz baino musikari gehiagoren laguntza izan du. Horretaz guztiaz mintzatu da Jagoba Salvador eta Eneritz Furyak-ekin, eta gaineran Idoia Hernandez 'Hatxe' musikariaren pieza berezi bat aholkatu digu.

Badira sei urte Eñaut Marti Zinkunegi oriotarra Shanghai hirira joan zenetik ikasketak amaitzera eta geroztik musikari gisa ibilbidea garatzen ari da Txinan. Shanghai Qiutian taldearekin profesionalizazioaren bidea hartu berri du eta Txinako musika eszenaren barru-barruko ezagutza du Giranice taldeko kide ohiak. Hango esperientziaren berri eman digu saio honetan. 

Musika eta irudien arteko harremanaz aritu dira saio honetan, eta zehazkiago zuzeneko emanaldietan irudiak jartzen aritzen direnen zereginaz. Horretan iaioak diren Maialen Belaustegi (Testura, Olor....) eta Jokin Guridi (Eyharts, Telmo Trenor) elkarrizketatu dituzte Jagoba Salvador eta Eneritz Furyakek. Horrez gain, Benizze proiektu berriaren lehen abestia entzun ahal izan dugu.

Aste honetan abiatu da Bilboko Loraldia jaialdiaren ekitaldi berria. Euskarazko sorkuntzaren hainbat disziplinatako sormen lanak erakutsiko ditu martxoaren 27a bitartean. Amaia Ocerin jaialdiko komunikazio arduradunak festibalaren filosofia eta aurtengo egitarauaren xehetasun guztiak azaldu dizkigu. Horrez gain, Sofa, Maddi Oihenart, Ruper Ordorika eta Sortaldekoak entzuteko aukera izan dugu.

Urte hasieran argitaratutako lanik nabarmenenetako bat da Vulk taldearen "Vulk ez da" diskoa. Bilboko laukoteak euskaraz osorik grabatzen duen lehen lana da, eta Euskal Herritik kanpo ere oihartzun handia izaten ari da, Madril eta Bartzelonako kontzertuetan izandako harrerak erakusten duenez. Diskoaz hitz egiteko Jangitz Larrañaga bateria jolea elkarrizketatu dute, eta hark aukeratutako Borrokan taldearen abesti bat ere entzun ahal izan dugu. Horrez gain, Catch & Soul taldea ezagutu dugu atal honetan.

Atal honetan Ander Zulaika bateria jolea elkarrizketatu dute Jagoba Salvadorrek eta Eneritz Furyakek. Eñaut Elorrieta, Olatz Salvador, Labeque ahizpak eta beste hainbatekin ibilitakoa da Zulaika, eta "soldatapeko" musikaria izateari buruz eta besteen proiektuetan aritzeari buruz aritu dira solasean. Horrez gain, Neomak, J Martina, Itoiz eta Korrikaren aurtengo kantua entzun ahal dira

2000ko hamarkadan Donostialdean izan zen eszena hartu dute hizpide atal honetan, Instagram sare sozialeko "Beste batek egindako abestia naiz" kontutik abiatuta. Kontua sortu zuen Kyxo taldeko Endika Garcia elkarrizketatu dute Eneritz Furyak eta Jagoba Salvadorrek, eta, besteak beste, Jousilouli, Cohen, Yaw edota Instep taldeen abestiak ekarri dituzte gogora.

Hainbat musika kazetarik aukeratutako kantu eta diskoen zerrendak argitaratu ditu BADOK atariak aste honetan, 2021. urteak emandakoaren laburpen gisa. Zerrenda horiek aukera ona izaten dira ordura arte entzun gabeko diskoak edota artista berriak deskubritzeko. Hori egin dute Jagoba Salvador eta Eneritz Furyak-ek atal honetan. Konpost, Phatal, Markes Iraizoz edota Ixaberen kantuak jarri dituzte, besteak beste. 

Atal berri honetan espazioan barneratu gaitu Diabolo Kiwi taldearen 'Uhin galduak' lan berriak. Allande Etxeberri baxu jolea izan dugu lagun bidaia intergalaktiko honetan. Horrez gain, lan berrietan antzeko kontzeptua —zientzia fikzioa, galaxia...— darabilten Kerobia eta Onki Xin taldeen kantuak entzun ditugu.

Datorren astean zabalduko ditu ateak Durangoko Azokak, eta horren barruan Ahotsenea guneak. Bost egunetan 50 kontzertu hartuko ditu Plateruena kafe antzokiak. Miren Narbaiza Ahotseneako koordinatzaileak aurtengo ediziorako aurreikuspenak azaldu dizkigu elkarrizketa kuze batean. Horrez gain, Ghau proiektu berria eta Joseba Tapiaren lan berria izan dituzte hizpide atal honetan.

Azken aldian ugari dira euskal abestien bertsioak egitea erabaki duten taldeak eta abeslariak. Kantu baten moldaketari ekiterakoan hainbat ikuspuntutik egin daiteke, jatorrizkoarekiko atxikimendutik zein jatorrizkoa berrasmatzeko asmotik. Horietako batzuk entzungo ditugu atal honetan, besteak beste Iseok egindako "Baldorba" (Benito Lertxundi) eta Jon Maiaren "Nirekin" (Gozategi).

Antuxuna, Hatxe eta Sega Sound Killers proiektuetako kideak elkarrizketatu ditugu Piztu Meta izeneko Matchfunding kanpainan parte hartzen ari direlako. Proposatu dituzten proiektuak azaldu dizkigute, eta era berean, diru-laguntzei eta crowdfundinga bezalako baliabideei buruzko hausnarketa egin ahal izan dugu.

Zuk nola entzuten duzu musika, euskarri fisikoan ala formatu digitalean? Galdera horretatik abiatu dute Jagoba Salvador eta Eneritz Furyakek atal berria. Binilo zale amorratua den Asier Mendizabal 'Nokono' gonbidatu dute horretaz hitz egiteko. Horrez gain, Petra, Vulk eta La Rekbaren abestiak entzuteko parada izan da.

Musika esperimental eta elektronikoari lotutako saioa osatu dute Jagoba Salvador eta Eneritz Furyak podcastaren egileek. Horretaz hitz egiteko Bilbon 2014. urtean sortutako Eclectic Reactions zigiluko kideetako bat gonbidatu dute, Joni (We Love Dolce Vita). Horrez gain, ohi bezala, azkenaldian argitaratutako zenbait nobedade entzuteko aukera izan da, tartean Maite Larburu eta Gianterenak.

Udako atsedenaldiaren ostean itzuli da 'Dunbala', eta beste itzulera bat izan du hizpide atal honetan. Izan ere, Musikazuzenean.eus kontzertuen agenda digitala hasi da berriz martxan. Halaber, Hamaika Telebistako Musika Zuzenean saioak 150. atala aireratu du aste honetan. Horretaz guztiaz mintzatzeko, Koldo Otamendi gonbidatu dute podcastera.

Gaur hastekoa den Euskal Herria Zuzenean jaialdiak bete du ikasturte honetako azken saioa. 2020ko etenaren ostean, indartsu itzuli da festibala eta nagusiki Euskal Herriko taldeez osaturiko egitarau erakargarria eskainiko du hiru egunez Irisarrin (Behe Nafarroa). Egitarauaren errepaso zehatza egiteaz gain, Julen Oillarburu antolakuntza taldeko kidearekin mintzatu dira.

Pop eta rock doinuetatik aldendu eta musika klasikoari lotu izan zaion instrumentu bat da atal honetako protagonista: biolontxeloa. Horretarako, Eñaut Zubizarreta 'Trigger' musikaria elkarrizketatu dute; hainbat proiektutan dabil murgilduta Zubizarreta (Trigger, Poliedro, Wood Strings...), biolontxeloaren adierazpide ezberdinak ikertuz eta arakatuz.

Sofa taldearen itzulera baliatu dute Jagoba Salvador eta Eneritz Furyak-ek musika instrumentala jorratzen duten taldeei buruzko saio monografikoa osatzeko. Horrela, Zarauzko (Gipuzkoa) hirukoteaz gain, Yakuzi, Alba, Buffalo, Hyedra eta Giranice bezalako taldeen abestiak entzuteko parada izan dugu.

Unean uneko kolaborazioa, musikarien artean hain ohikoa den elkarlan mota hori, izan da atal honetako ardatz eta gai nagusia. Saioa osatzeko zerrenda "apur bat nostalgikoa" prestatu dute Eneritz Furyak eta Jagoba Salvadorrek, eta besteak beste Mikel Laboa eta Ruper Ordorika, Kaskezur eta Miren Narbaiza, Gatibu eta Izaro edota Pelax eta Telmo Trenor entzun ahal izango ditugu.

Kartelen garrantzia, kontzertu baten erakargarritasuna azpimarratzeko duten ahalmena, izan da Jagoba Salvador eta Eneritz Furyakek atal honetarako aukeratu duten gaia. Alots Arregi gonbidatu dute horretaz hitz egiteko. Azkoitiko Matadeixe gune autogestionatuko kontzertuen afixak sortzen ditu Arregik. Horrez gain, Keu Agirretxea eta Ziztada & Rlantzen abesti berriak entzun eta komentatu dituzte.

Abestietarako hitzak idazteko langintzaz aritu dira 'Dunbala' podcastaren atal honetan. Gartxot Unsain musikaria gonbidatu dute horretaz hitz egiteko. Hainbat taldetan aritutakoa da Unsain (Madeleine, Yaw, Bananas, Bi Zaldi, Grises...) eta hitzak idatzi ditu beste zenbait talderentzat (Nerabe, Merina Gris...).

Euskal metal musikari eskaini diote 'Dunbala' podcastaren atal berria eta horretaz hitz egiteko ia inor baino aproposagoa den Inaxio Esnaola Aranzadi kazetari eta "metalaren aktibista" gonbidatu dute. Hogei urte betetzear den Herriko Burdina webgunearen arduraduna da Esnaola, euskal metala sustatzeko martxan jarri dituen beste hainbat ekimenen artean.

Azken asteetan argitaratutako kantu berrien errepasoa egin dugu atal honetan. Horrela, estilo askotariko abestiak entzun ahal izan ditugu: Lamiak hirukoteak riff gitarra sendoak ekarri ditu, LauKatuk pop-rock dantzagarria, Xatirok eta Raperuk jarri dute rap alea, muturreko metalera hurbildu gara Broken Legacyrekin, blues akustikoan murgildu gara Rolan Garcesekin eta esperimentazio elektronikoa dastatu dugu Myriam RZMrekin.

Urtebeteko ibilbidea egin du 'Dunbala' podcastak, eta urtemugak beste albiste pozgarri batekin egin du bat. Izan ere, aste honetan jaso du Maite Arroitajauregi musikariak Espainiako zinema Akademiak ematen duen Goya saria, Aran Callejarekin batera 'Akelarre' filmerako egindako musikarengatik. Lan horretaz eta Mursegoren hurrengo proiektuez luze eta zabal mintzatu da Arroitajauregi.

Euskal Herriko rap musikaren eszena izan dute hizpide 'Dunbala' podcastaren atal honetan. Horretaz hitz egiteko La Basu gonbidatu dute, gurean ibilbide luzeenetakoa duen rap abeslaria. Luze eta zabal mintzatu dira hip hop kulturaz, euskarazko rapaz, emakumearen eta raparen arteko harremanaz, zuzenekoez eta abar. Horrez gain, Orbain Unit eta TOC taldeen kantu berriak izan dituzte aipagai Jagoba Salvador eta Eneritz Furyakek.

Euskal Herrian tradizio luzea duten Irrati libreak hartu dituzte hizpide atal honetan. Horretarako, Asier Mendizabal Donostiako Ttan Ttakun irratiko kidea gonbidatu dute. Horrez gain, Arima, Bakelite, Muskulo eta Bamms taldeen abestiak entzun daitezke Jagoba Salvador eta Eneritz Furyakek zuzendutako saioan.

Olatz Salvador izan da atal berriaren protagonista. 'Aho uhal' diskoa plazaratu berri du kantari donostiarrak eta horri buruz aritu da solasean Jagoba Salvador eta Eneritz Furyakekin. Horrez gain, Grises taldearen "Galdu arte" abestia eta Mursegok 'Akelarre' filmerako egindako musika izan dituzte hizpide, besteak beste.

Amaitu berri den urteak emandakoari gainbegiratua eman diote podcastaren 2021eko lehen saioan. Horretarako hiru lagun gonbidatu dituzte: Jon Eskisabel BADOK atariko arduraduna, Ihintza Orbegozo 'Berria' egunkariko disko kritikaria eta Lorea Argarate disko jartzailea (Las Tea Party). Haien ustez gehien nabarmendutako diskoak izan dituzte hizpide solasaldian.

Miren Narbaiza musikari eta Ahotseneako koordinatzailea izan da atal honetako gonbidatu nagusia. Amaitu berri den Durangoko Azokaren ezohiko ekitalditik ateratako ondorioez luze eta zabal mintzatu da. Horrez gain, Mikel Iraetaren eta Rafa Ruedaren lan berriak hizpide izan dituzte Jagoba Salvador eta Eneritz Furyak esatariek.

Bi gonbidatu izan dituzte 'Dunbala' podcastaren atal honetan. Batetik, Unai Pelayo elkarrizketatu dute, Burrundaria izenpean kaleratu duen diskoaren harira. Ondoren, Beñat Rodriguez Olrait estudioko diseinatzailarekin mintzatu dira 'Kantu eskukadak' liburuaz. Ehun euskal talderen hitzak eta haientzat egindako ilustrazioak biltzen ditu 'Gaztezulo' aldizkariak argitaratutako lanak.

Durangoko Azoka hurbildu ahala lan berriak plazaratzen ari dira. Horietako bat da Pleura taldearen "Bakarhilketa", Nafarroako laukotearen estreinako diskoa. Ion Mayordomo eta Unai Urroz taldekideak elkarrizketatu dituzte Jagoba Salvador eta Eneritz Furyakek. Halaber, Izaki Gardenak eta Nabilen kantu berriak entzun ahal dira saio honetan.

Musika jaialdien eremuan murgildu dira Eneritz Furyak eta Jagoba Salvador. Arkaitz Villar Beratu jaialdiaren antolakuntza taldeko kidea elkarrizketatu dute. Hirugarren urtez antolatu dute jaialdia Oñatin, azaroaren 4tik 8ra, eta besteak beste Sua, Joseba Irazoki, Gaizka Insunza, Hakima Flissi eta Los Sara Fontanen emanaldiak eskainiko ditu. Azaroan egitekoa den beste jaialdi bat ere izan dute hizpide, Galdakaoko Kaiola. 

Kontzertuetako argazkigintzari eskaini diote Jagoba Salvador eta Eneritz Furyak-ek 14. atalaren tarte nagusia. Horretarako, Jon Iraundegi eta Eider Iturriaga elkarrizketatu dituzte. Iraundegi 80ko hamarkadatik ari da zuzeneko emanaldietan argazkiak ateratzen; Iturriagak berriz, hainbat lan egin ditu, tartean Berri Txarrak taldearentzat. Horrez gain, Merina Gris talde berriaren lehen singlea aipagai izan dute saioan.

Durangoko Plateruena kafe antzokiaren itxieraren berri izan genuen duela egun batzuk. Euskal musikarien lana plazaratzeko ezinbesteko aterpe izan da Plateruena hamasei urtez. Abiapuntu horretatik, beste zenbait areto hartu dituzte hizpide Eneritz Furyak eta Jagoba Salvadorrek, eta haiekin lotutako oroitzapen pertsonalak aletu dituzte, Glaukoma, Akauzazte, Willis Drummond eta Liberen musikaz lagunduta, besteak beste.

Donostiako Zinemaldiaren aitzakian, modu batean edo bestean zinemarekin loturiko abestiek osatu dute 'Dunbala' podcastaren 12. atala. Besteak beste, Mursego, Ama Say, Norman, Jousilouli, Amorante, Joxe Ripiau, M-ak, Aizkorak Zorroztu eta Markos Untzetaren kantuak entzun ahal dira saioan. 

Abuztuko etenaldiaren ostean itzuli da Jagoba Salvador eta Eneritz Furyak-ek zuzendutako saioa. Azken asteetan argitaratutako nobedadeak izan dituzte hizpide, tartean Dena hirukote gaztearen rock sendoa, Kyxo taldearen "pop axolagabea" edota Argazki Bat Behelainoan izeneko proiektu minimalista.

Abuztuan oporrak hartu aurreko azken saioan, Hannot Mintegia elkarrizketatu dute Moxal proiektuaren azken lanaz hitz egiteko, eta hainbat musikarik (Olatz Salvador, Bananas, Peru Galbete, Nogen, Birkit, Ro eta Urgatz) etorkizun hurbileko asmoak azaldu dituzte. Halaber, ohi bezala, BADOKen aurkitu daitezkeen eduki interesgarrietako batzuk aipatu dituzte.

Hamar urtez UsoPop jaialdia antolatu duen lagun taldeko kide Joanes Garcia Basurko elkarrizketatu dugu podcastaren bederatzigarren saioan. Azaroan egitekoa den Mapa Galduak jaialdi berriaren inguruko azalpenak eman dizkigu. Horrez gain, Edurne Azkarate antzezlearen gustu musikalak ezagutu ditugu, eta BADOK atarian aurkitu daitezkeen zenbait eduki interesgarri aipatu ditugu.

'Dunbala' podcastaren zortzigarren saioan, Badok atarian aurkitu daitezkeen azken nobedadeen berri eman dute Jagoba Salvadorrek eta Eneritz Furyakek, eta ondoren Zestoako (Gipuzkoa) Gaztain estudiora jo dute , hango soinu teknikari, ekoizle eta musikari Eñaut Gaztañagarekin hitz egiteko. Saioaren azken minutuetan, Maddi Castro 'Pikuak' websailaren zuzendariaren gustu musikalak ezagutu ditugu.

Behi Bideko Andere Xuriak taldea izan da 'Dunbala' podcastaren zazpigarren atalaren protagonistetako bat. Pantxix Bidart taldekidea elkarrizketatu dute Jagoba Salvador eta Eneritz Furyakek, "t'mAmAztAng"t" izenburuko disko berriaren harira. Horrez gain, Asier Burguete aktore eta dantzariarekin mintzatu dira, haren gustu musikalak ezagutzeko, eta BADOK atarian aurkitutako azken edukien berri eman dute.

'Dunbala' podcastaren seigarren alea 'Hautsi da anphora' diskoari buruzko saio monografikoa da. 40 urte bete ditu euskal kantagintzan mugarri ezarri zuen Ruper Ordorikaren lehen diskoak. Jagoba Salvador eta Eneritz Furyak-ek lau lagun gonbidatu dituzte diskoari buruz hitz egitera: Josu Zabala eta Maite Larburu musikariak, Imanol Agirre Loraldia jaialdiko zuzendaria eta Fermin Etxegoien kazetari eta idazlea.

Dunbala podcastaren bosgarren saioan, azken bi asteetan argitaratutako zenbait kantu berri aipatzeaz gain, diskoen azalak hartu dituzte hizpide Jagoba Salvador eta Eneritz Furyakek. Horretarako helduleku, Xabier Gantzarainek BADOKeko 'Azaletik' atalean idatzitako artikuluak izan dituzte. Horrez gain, Rakel Arenaza elkarrizketatu dute, Raitx proiektuaren lehen diskoaz solasteko, eta Danele Sarriugarte idazleak musikarekin duen harremanaz hitz egin digu.

Konfinamendu garaian haurrak etxetik atera ahal izatea eskatzeko Maite Arroitajauregik sortutako "Txakurran lepokoa erosi dut merke online" abestitik abiatuz, haurrengan pentsatuta sortutako abestien errepasoa egin dute Eneritz Furyak eta Jagoba Salvadorrek laugarren saioan. Horrez gain, Mukuru kolektiboko bi kiderekin hitz egin dute eta Asisko Urmenetaren gustuko musika ezagutarazi digute.

Hainbat gai izan dituzte hizpide Eneritz Furyak eta Jagoba Salvadorrek hirugarren saioan: Krii Kolektiboari Badok-en egindako elkarrizketa aitzaki, musika elektronikoari heldu diote; bideoklipak ekoizten dituen Arriguri kolektiboko Xabi Ojinagarekin mintzatu dira eta Itziar Ituño aktorearekin abiatu dute euskal kulturgileen gustuko musika ezagutzeko atal berria. Sara Zozaya, Nizuri Tazuneri & Urgatz, Ingot eta Olatz Zugastik jarri dute musika.

Koronabirusaren krisiak ere eragin dio 'Dunbala' podcastaren ekoizpenari, eta ohiko grabazio estudiotik beharrean norbere etxetik osatu dute Jagoba Salvador eta Eneritz Furyak-ek bigarren atala. Pandemiak bertan behera utzitako kontzertuen hutsunea betetzeko sarean sortutako ekimenak izan dituzte hizpide eta horri buruzko hainbat musikariren iritziak bildu.

Badok atariaren 'Dunbala' podcast berria martxan da. Lehen saioan hainbat gai izan dituzte hizpide Eneritz Furyak eta Jagoba Salvadorrek: Gernikan ehundik gora emakume musikarik egindako 'Elkarrekin egon ginen' topaketa izan da abiapuntua, eta ondoren Arima taldearen zuzenekoaz, Keu Agirretxearen 'Lagunak, ura eta bakea' proiektuaz, eta Testura, Verde Prato eta Liherren disko berriez hitz egin dute.