New Yorkeko munduak

New Yorkeko munduak

Desira maletategi barruan

Kirmen Uribe

Tennessee aldean dagoen Sewanee izeneko unibertsitatera gonbidatu ninduen David Colbert irakasleak. Bertan dago Tennessee Williams antzezlan idazlearen ondarearen zati bat, eta hura ikusteko aukera izan nuen. Paper gehienak, egia esan, Harvarden daude. Tennessek haiei eman zien artxibategiko zati handiena.

00:00 / 3:24

Entzuteko beste bide batzuk

Desira maletategi barruan

Kirmen Uribe

2022ko apirilak 25

Aldiz, hegoaldearekin zuen zor sentimentala kitatu nahian edo, Sewanneko unibertsitateari eman zizkion egile eskubideak. Paperak Harvardera eta dirua Tennesseera. Ez dago gaizki. Ez hori bakarrik, haren gutun, eskuizkribu eta objektu batzuk ere badituzte han. Sewaneeko irakasle bat Williams hil eta gutxira haren Floridako etxera joan zen, eta maletategian ahal zuen guztia sartu zuen. Ehundaka kilometro egin zituen autoz horretarako, Estatu Batuetako hegoaldea ezker eskuin zeharkatuz. Ez zen gauza asko geratzen. Aurretik Harvardekoak egonak ziren. Maletategian sartzen zen guztia hartu eta buelta egin zuen. Horixe da ikusi nuena, maletategian sartu zen hura dena. Objektuen artean, txiskeroa, txigorgailua eta telefono gida. Gidak orrialde batzuk kenduta ditu. Oraindik badauden zenbakien artean, Truman Capoterena dago. Bat batean, hura apuntatzeko gogoa izan nuen, pentsaturik Capotek erantzun egingo zidala, nahiz eta urte batzuk diren zendu zela. Tennessee Williamsen apunteak hoteleko orrietan daude eginda asko, denak dira elkarrizketak, antzezlanen zatiak. Hoteletan idazten zuten garai hartako idazleek, huraxe zen haien bizimodua. Artxibozainak Desira deritzon tranbia obraren euskarazko bertsioa ere erakutsi zidan agurtu aurretik, Xabi Payaren itzulpena, hain zuzen, aurrez pentsatua zuen ezusteko atsegin bat. Atera baino lehen, mihise batean jarri nuen arreta. Hil baino gutxi lehenago koadro bat margotu zuen Tennessee Williamsek. Koloretsua oso. Gazte batzuk biluzik ikusten dira bainatzen, gorputzen edertasuna, bizitzaren indarra. Eta urrunean bonba nuklear bat lehertzen. Tennessee Williams hori da, desira lehen planoan. Eta maletategi bat ixten den abiadurarekin bukatzen den bizitza, gutxien espero duzunean.

Saio honetako beste atal batzuk