Izan BERRIAlaguna

New Yorkeko munduak

New Yorkeko munduak

Kutsatuta

Kirmen Uribe

Aste honetako podcasta New Yorketik egin behar nuen. Baina ezin izan dut hara bidaiatu. Estatu Batuetan bi Pfizer txerto hartuak nituen apirilean, eta Durangoko Azokara liburu berria aurkeztera etorri eta hemen gaixotu naiz Covidaz. Batek daki non harrapatu nuen, aireportuan, Frankfurteko geldialdian, Ondarroan, Bilbon, Durangon bertan… hobeto horri buelta gehiegirik ez ematea. Kontua da kutsatu egin nintzela. Apiriletik hona hilabete gehiegi izango dira agian txertoen eraginkortasunari eusteko.

00:00 / 3:14

Entzuteko beste bide batzuk

Kutsatuta

Kirmen Uribe

2021ko abenduak 13

Gaizki sentitzen hasi nintzen pasa den astean, azken hogeita bat egunez jarraian egin dituen euri jasen eragina zela pentsatu nuen hasieran, hoztuta eta bustita iristen bainintzen etxera Durangotik. Aurreko podcasta ere ohean idatzi nuen, pasa den igandean. Hobera egiten ez nuenez eta susmoak hartuta, osasun zentrora joan nintzen proba egitera. Ilara luzea zegoen, umeak, jende nagusia, denetatik. Niri azkena egokitu zitzaidan. Galdetu nion erizainari bidaiatu egin behar nuen New Yorkera, han nuela familia zain eta zenbat denboran izango nuen emaitza. “Zaude hor kanpoan ordu erdi batez zain eta esango dizugu”, erantzun zidan atsegin. Eta halaxe, “sentitzen dut, kutsatuta zaude”, esanez hurreratu zitzaidan minutu batuetara, ardura keinu batekin. “Gorde etxean eta zaindu zaitez”.

Izan ere, Covida ez da broma. Ondarroara iritsi bezain laster jakin nuen gure aitaren adiskide bat hil berri zela gaitzarekin. Udan ikusi nuen azken aldian, pozik zihoan lagun artean bazkaltzera. Orobat, Bar Puerto ikuskizunean parte hartu zuen lagun bat ere joan da, Unai, arrantzalea hura ere, kontu kontalaria eta atsegina, soilik ni baino hiru lau urte zaharragoa. Eta horiek soilik denbora tarte txiki honetan.

Sukar egun batzuk eta gero, ematen du gorputza gailendu zaiola gaitzari, hobeto nago. Atera naiz atakatik, baina ezin dute denek gauza bera esan.

Beraz, tentuz ibili, sekula ez dakizu.



Saio honetako beste atal batzuk