New Yorkeko munduak

New Yorkeko munduak

Pantailarik gabe

Kirmen Uribe

Auzoan zabaldu berri duten kafetegira joan gara semea eta biok etxeko lanak egitera. Semeari gustatzen zaio ordenagailua zabaldu eta hantxe egitea lanak, “nagusien modura”. Kafetegi berria frantziar estilokoa da, antzinako itxurako mahaiekin, loreekin eta, atsegina. Ordenagailu eramangarria atera dugu eskolako lanei ekiteko. Halako batean, zerbitzaria hurreratu zaigu esanez kafetegia ordenagailurik gabeko gunea dela. Eta mahaiko lore-sortan eskegia zegoen txartelari begiratzeko galdegin digu. “Leku hau ordenagailuetatik libre dagoen tokia da. Nahi baduzu liburu bat zabaldu eta egon zaitezke luzaroan hura irakurtzen, ala hitz aspertuan lagunekin, baina mesedez hemen ez teklatu”. Horixe zioen txartelak. Beraz, lotsatuta, ordenagailua itxi eta motxilan sartu dugu, eta txartelak zioen bezala berbetan aritu, kafesneaz, txokolateaz eta opilez gozatuz.

00:00 / 3:19

Entzuteko beste bide batzuk

Pantailarik gabe

Kirmen Uribe

2022ko apirilak 11

Kafetegi hura ez da hautu hori egiten duen leku bakarra. Gero eta lokal gehiagotan gaztigatzen dute ordenagailua ez eramateko. Pandemia aurretik, kafetegiak jendez beteak egoten ziren, bakoitza bere ordenagailuarekin eta mahaian eserita, beharrean.

Neure buruari galdetzen diot benetan bizitza geldo batera bueltatzeko izango den politika berri hau. Ala bezeroak goiz osoa kafe bakar batekin ez igarotzeko izango den, mahaia okupatzen. Hortik ere egongo da, azkenean New Yorken lokalen alokairuak garesti dira eta komeni zaie mugimendua hura ordaintzeko. Ala benetan sinetsiko dute jendeak denbora gelditzeko garaia dela hau, dela adiskide batekin dela liburu batekin, bakardade gozoan? Neurtzen hasi ote gara teknologiarekin dugun menpekotasuna?

Batek daki. Seguruena arrazoia soilik ekonomikoa izango da. Baina nik eskertu nuen une batez pantaila itxi eta motxilan gordetzea. Semeak eta biok barre egin genuen eta amets egin, ziurrena sekula gertatuko ez diren gauzekin. Polita izan zen.

Eta etxeko lanak, doazela pikutara.

Saio honetako beste atal batzuk