Izan BERRIAlaguna

New Yorkeko munduak

New Yorkeko munduak

Times Squareko argietan

Kirmen Uribe

Baraxil Bengoa Guenetxea, Brooklynen bizi den arrasatearrari, eskakizun bat egin zioten lanean. Enpresak erabaki zuen New Yorkeko burtsan sartzea eta horretarako beharrezkoa omen zen enpresa ezagun bihurtzea. Gauzak horrela, enpresaren irudiaren ardura duen taldeak ideia bat izan zuen: zer hobeagoa enpresa ezagutarazteko langileen argazkiak Times Square-ko pantaila erraldoietan jartzea baino.

00:00 / 3:42

Entzuteko beste bide batzuk

Times Squareko argietan

Kirmen Uribe

2022ko otsailak 14

Baraxil Bengoa Guenetxea, Brooklynen bizi den arrasatearrari, eskakizun bat egin zioten lanean. Enpresak erabaki zuen New Yorkeko burtsan sartzea eta horretarako beharrezkoa omen zen enpresa ezagun bihurtzea. Gauzak horrela, enpresaren irudiaren ardura duen taldeak ideia bat izan zuen: zer hobeagoa enpresa ezagutarazteko langileen argazkiak Times Square-ko pantaila erraldoietan jartzea baino. Eskuarki, Times Squareko pantailetan aktoreak eta modeloak agertzen dira. Filmak, antzerkia, musikalak, arropa, teknologia, dena da iragarki han. Orduan, irudi-arduradunen ustez, jende arrunta pantaila erraldoietan jartzea iraultza bat izango zen.
    Dena den, Baraxilek, euskaldun onaren zuhurtziaz, ezetz esan zuen. Lotsa ematen zion horrek denak. Gauza horiek ez ziren berarentzat. Hori bai, amari kontatu zion irudi taldearen burutapena, grazia egingo ziolakoan. Eta, katean, amak Soraluzeko izebari. Halaxe, izebari otu zitzaion sekulako aukera galtzea zela hura, euskaldun bat Times Squareko pantailetan. Hori bai ala bai egin behar zen! Orduan, izebaren proposamena izan zen, Baraxilek berak bakarrik ez bazuen atera nahi, bada familiako kideekin agertzea bazuela, familiako argazkiak bidalita. Horrela, denak batera agertuko ziren New Yorkeko bihotzean, akabo lotsak. Izebak ordainetan eskatu zion gauza bakarra izan zen argazkiak ateratzen zirenean bideoz grabatzea eta berari igortzea, Soraluzeko bere lagunekin partekatu zezan balentria.
    Eta halaxe, irudi-taldeak baino familiak indar handiagoa duelako, agertu ziren Baraxil eta familia Times Square-ko pantailan, aktore, modelo, politikari eta bestelakoekin batera. Euskal Herrian ateratako argazkiak ziren, mendian, naturalak, poserik gabekoak, maitagarriak. Baraxil bera alaba Nahia eta emazte Carolekin, gurasoak, eta nola ez, Soraluzeko izeba.
    Ez dakit enpresaren akzioek gora egingo zuten. Baina Euskal Herriko familiako pozak, hori seguru.

Saio honetako beste atal batzuk