Izan BERRIAlaguna

Zaitun

Zaitun

Agur Salvini, agur

Ane Irazabal

Milanen "Ligako komunista" izenarekin da ezaguna. Urte dezente pasa dira Salvinik Padaniako independentzia eskatu eta komunismoaren balioak aldarrikatu zituenetik. Garai hartan, estelada eta ikurriña zituzten kamisetak janzten zituen.

00:00 / 3:47

Entzuteko beste bide batzuk

Agur Salvini, agur

Ane Irazabal

2019ko irailak 11

Milanen "Ligako komunista" izenarekin da ezaguna. Urte dezente pasa dira Salvinik Padaniako independentzia eskatu eta komunismoaren balioak aldarrikatu zituenetik. Garai hartan, estelada eta ikurriña zituzten kamisetak janzten zituen. Zaila da argazki horiek ikusi eta oilo ipurdia ez jartzea, baina hemerotekak iragana gogoratzeko balio du. Bada, orduan ere arrazista hutsa zen Salvini. Bere kanpaina ez zen Mediterraneoaren beste aldetik datozen iheslarien aurka, Italia hegoaldeko herritarren kontra baizik.

"Usaindu kiratsa, txakurrek ere ihes egiten dute, napolitarrak iristen ari dira", oihu egiten zuen orduan Salvinik. Baina politikan dena ahazten da, eta lider ultraeskuindarrak Liga alderdia eraldatzea erabaki zuen. Helburua ez zen Erromatik independizatzea, Erroman boterea eskuratzea baizik. Horretarako, Marine Le Penen estrategia jarraitu eta Italia zabaleko eskuin muturreko alderdia bilakatu du Liga. Estrategia politikoa oso arrakastatsua izan zen. Etsaiak ez ziren Italia hegoaldeko herritarrak, Bruselako burokratak eta asilo eskatzaileak baizik. Azken hauteskundeetan botoen %17 eskuratu eta Barne ministro izendatu zuten koalizio berrian. Migratzaileen eta gutxiengoen aurkako bere politika xenofoboek Italiako historiaren txokorik ilunenak beteko dituzte.

Salvini ez da inoiz sinisduna izan. Azkenaldian, berriz, ama birjina eta gurutzea musukatu ditu ekitaldi politiko guztietan. Udan, hondartzako txosnetan Italiako ereserkia jartzen zuen bitartean, kamisetarik gabe eta egurrezko gurutzearekin atera ditu argazki guztiak. Italia hegoaldeko herritar kontserbadorearen botoa erakartzeko, diote analista politikoek, duela urte batzuk mespretxatu zituen herritarren botoa.

Eta hondartzako mojitoez estasiatuta, Salvinik Giuseppe Conte lehen ministroaren aurkako zentsura mozioa aurkeztu zuen. Bere estrategia argia zen: gobernua erortzen utzi, hauteskundeak bultzatu eta bozak irabazi. Inkestek botoen %35 aurreikusten zuten lider ultraeskuindarrarentzat eta Salvinik bakarrik gobernatzeko aukera ikusten zuen, soilik Fratelli d’italia alderdi neofaxistaren eta Silvio Berlusconiren Forza Italia alderdiaren laguntzarekin.

Baina kukuak oker jo du. Bost Izarren Mugimendua alderdi sozialdemokratarengana hurbildu da eta gobernu itun berria sinatu du. Salvini ehunetik zerora pasa da egun gutxitan, alegia, gobernuaren programa politikoa inposatzetik ezerezaren esparrura. Lider ultraeskuindarraren heriotza politikoaren aurrean ote gaude edo guda berri baterako prestatzen hasi da? Bere morru aurpegiak dena dio: Salviniren etsairik handiena Salvini bera izan da.

Saio honetako beste atal batzuk