Izan BERRIAlaguna

Zaitun

Zaitun

Arkitektura eta memoria historikoa

Ane Irazabal

Berlinen ehunka eraikin daude beste garai bat gogorarazten dizkigutenak. Auzo batetik bestera salto egin eta badirudi bi mundu zeharo antagonikoetan bizi naizela. Alde batetik, hiri futurista bat ordezkatzen duten eraikin modernoak ikusten ditut eta bestetik Sobiet Batasunera eramaten nauten edifizio komunistak. Izan ere, hamarkada luzez bi errealitateak gailendu ziren hirian. II. Mundu Gerran aliatuek Alemaniako hiriburua bonbardatu eta ia guztiz suntsitu zutenetik, higiezin espekulazioak dena bete zuen. Mendebaldeak kapitalismoaren leherketa bizi izan zuen eta Ekialdeak, berriz, estatu sozialistaren garapena. Harresiak, gainera, bi errealitateak zeharo banatu zituen. Billy Wilderren 1,2,3 filmak (1961) maisuki kontatzen du zatiketa hori eta ez du esfortzurik aurrezten bi sistemak sutsuki kritikatzeko.

00:00 / 3:05

Entzuteko beste bide batzuk

Arkitektura eta memoria historikoa

Ane Irazabal

2022ko urtarrilak 5

Baina 1990eko hamarkadan, Mendebaldeak Ekialdea irentsi zuenean, Alemania berriak sinbolo sozialistak suntsitzeari ekin zion. Iragana desegiteko, iragan hori gogorarazten zuen arkitektura ere desegin beharra zegoen. Berlinen eraikin dezente bota dituzte orduz geroztik. Agian ezagunena Errepublikako Jauregia zen. Berlingo museoen uhartean kokatuta zegoen, II. Mundu Gerraren aitzitik Errege Jauregia zegoen tokian. 1973 eta 1976 artean eraiki zuten eta bertan zegoen Ekialdeko Alemaniako parlamentua. Baina 1991an, Alemania bateratuaren sinbolo berri bat sortzeko ahaleginetan, eraikin hori bota eta Errege Jauregiaren erreplika bat egiteko ideia zabaldu zen. Esan eta egin. Egun hori da turistek ikusten dutena.

Edonola ere, azken urteetan Ekialdeko Alemaniako sinbolo arkitektonikoak ez suntsitzearen aldeko mugimendu bat zabaldu da Berlinen. Gehienek ez dute sistema horren nostalgiarik sentitzen, baina uste dute iragana ez dela desegin behar. Errebantxaren estrategiak utzi dizkigu adibide beltz bat baino gehiago.

Saio honetako beste atal batzuk