Izan BERRIAlaguna

Zaitun

Zaitun

Berdeak eta haien printzipioak

Ane Irazabal

Alemaniara bizitzera etorri nintzenean, oso deigarria egin zitzaidan Alderdi Berdearen indarra. Italiatik etorrita, atentzio handia ematen zidan ekologisten erakartasun maila ikustea. Kontzientzia bizia zuten klima larrialdiari aurre egiteko politiken inguruan eta gazte asko hurbiltzeko gai ziren.

00:00 / 3:48

Entzuteko beste bide batzuk

Berdeak eta haien printzipioak

Ane Irazabal

2022ko ekainak 29

“Berdeak ezkertiarrak edo eskuinekoak al dira?” Galdetzen nien Alemanian aspalditik bizi diren kazetariei. “Ez bata ez bestea”, erantzuten zidaten gehienek. Beste modu batean esanda, “egoeraren arabera, batzuekin edo besteekin gobernatzeko gai dira”. Angela Merkeli agur esan zioten iragan iraileko bozetan, Berdeek boto urbanoa eta gaztea erakarri zuten. Baina ez hori bakarrik. Koalizio gobernura iritsi zirenean, zin egin zuten ikatzaren ekoizpenaren eta energia nuklearraren amaira azkartuko zutela. Energia berriztagarrien aldeko apustua zen haien helburu nagusia.

Hori duela sei hilabete gertatu zen. Gero Ukrainako gerra hasi zen eta politika guztiak hankaz gora jarri zituen. Orduz geroztik, Alemaniak eman duen 180 graduko biraren baitan, Berdeei estrategia aldaketa asko sumatu zaie. Une batetik bestera, indar bakezalea izatetik Ukrainara arma pisutsuak bidaltzearen aldeko adierazpenik gogorrenak egin dituzte eta politika energetikoa garai berrietara egokitu beharra dagoela onartu dute. Alegia, pragmatismoaren onerako, atzera egin behar dela.

Robert Habeck ekonomia ministroa, Berdeen liderra da eta ospe handia eskuratu du herritarrei heldutasunez hitz egiten dielako. Ez da bakarra, Ingrid Nestle parlamentariak ere ez du koplarik erabiltzen. Errusiak gasaren inportazioa biziki gutxitu ostean, neguan energia nahikoa izateko sakrifizio batzuk egin behar direla ohartarazi du. Horrek esan nahi du herritar bakoitzak aurreztu egin behar duela, baita lehen ezinezkotzat jotzen ziren aukera batzuk ontzat jo behar direla ere. Adibidez, ikatz gehiago erre, azken zentral nuklearrak irekita mantentzeko proposamenak ikertu eta demokratikoki oso fidagarriak ez diren Qatarren gisako bazkide energetikoak aurkitu.

Haien printzipioei muzin egin diete Berdeek? Haiek ezetz diote eta badirudi alemaniarrek arrazoia eman dietela. Azken inkesten arabera, hobekien baloratutako gobernuko kideen artean Berdeen ministroak daude. Dena realpolitik edo gobernagarritasunaren izenean.

Saio honetako beste atal batzuk