Izan BERRIAlaguna

Zaitun

Zaitun

Berlingo vietnamdarrak

Ane Irazabal

32 urte igaro dira Berlingo harresia erori zenetik. Urtero, azaroaren 9an, XX. mende amaierako gertakari historikorik nagusiena gogoratzen dute berlindarrek eta hamaika omenaldi egiten dituzte. Ni iritsi berria naiz Berlinera, eta jaioberriaren begiekin aztertzen dut hiria. Batek daki zenbat denbora pasa behar den zure burua turistatzat jotzeari utzi eta berlindarra sentitzeko. Askotan hausnartzen dut duela hilabete gutxira arte museo arkeologikorik ikusgarrienean bizi nintzela, alegia, Erroman; eta egun, berriz, Europako hiririk berrienean eta gazteenean bizi naizela. Berlinen.

00:00 / 3:20

Entzuteko beste bide batzuk

Berlingo vietnamdarrak

Ane Irazabal

2021ko azaroak 10

Baina niri historia gustatzen zait eta II. Mundu Gerran aliatuen bonbek dena suntsitu baino lehenago hiria nolakoa zen ikusteko argazki liburu bat erosi dut. Zer geratzen da Marlene Dietrichen hiritik? Ia ezer. Halere, Berlingo kaleetatik ibili eta hemengo arkitektura eklektikoak eta anitzak zeharo txundituta uzten nau. Bonbardatu gabeko XIX. mende amaierako auzo baten ondoan sobietar itxurako eraikin handiak aurki daitezke. Eta ez hori bakarrik. Hiriaren banaketak, alegia, eredu kapitalistaren eta sozialistaren arteko zatiketak, aniztasun demografikoa ere ekarri zuen. Berlinek jaso zituen migrazio fenomenoak dira horren adibidea.

Menbebaldeko Berlinen turkiarrak izan ziren etorkin talderik handiena. 1960ko hamarkadan lanesku merkea behar zuen, eta, milaka gazte turkiar erakartzeko helburuz, “langile gonbidatuen” hitzarmena sinatu zuen Istanbulekin. Ekialdeko aldean, berriz, sistema sozialista besarkatzen zuten herrialdeetako gazteak iritsi ziren. Angolako, Mozambikeko, eta, batez ere Vietnameko herritarrak. Handikeria sozialistaren sinboloa den Karl-Marx-Alee bulebarretik paseatzea besterik ez dago loradenda, jostundegi eta jatetxe GEHIENAK vietnamdarrAK DIRELA jabetzeko.

Batek baino gehiagok pentsatuko du Alemaniako batasunetik 30 urte baino gehiago pasa diren honetan, mugak lausotu egin direla eta dagoeneko ez dela ekialdearen eta mendebaldearen arteko desberdintasunik nabaritzen. Kebab dendak eta jatetxe vietnamdarrak nonahi daude. Baina auzoetako antolamendu demografikoan oso nabarikoa da zatiketa hori. Bat-batean konturatzen naiz azken 100 urteetako gertakari historiko nagusiak begi aurrean ditudala.  

Saio honetako beste atal batzuk