Izan BERRIAlaguna

Zaitun

Zaitun

Hanifa

Ane Irazabal

Castel Romano Erromatik 25 kilometrora dago, itsasoaren ondoan. Fabrizio De Andreren abesti batek dioen bezala, udaberrian mila mitxoleta gorriez beteriko zelaiez inguratuta dago. Castel Romano oso ezaguna da bertan kokatuta daudelako Cinecittà World jolas parkea, Designer Outlet luxuzko jantzien erosketa gunea eta Erromako ijitoen kanpalekurik handiena. Hirurak toki berean.

00:00 / 3:05

Entzuteko beste bide batzuk

Hanifa

Ane Irazabal

2020ko maiatzak 6

Castel Romano Erromatik 25 kilometrora dago, itsasoaren ondoan. Fabrizio De Andreren abesti batek dioen bezala, udaberrian mila mitxoleta gorriez beteriko zelaiez inguratuta dago. Castel Romano oso ezaguna da bertan kokatuta daudelako Cinecittà World jolas parkea, Designer Outlet luxuzko jantzien erosketa gunea eta Erromako ijitoen kanpalekurik handiena. Hirurak toki berean.

Errepidetik kotxez pasatzean, oso erraz ikus daitezke jolas parkearen eta erosketa zentroaren gaineko iragarkiak. Ijitoen kanpalekua, halere, ez dago inon seinalatuta. Errepidearen izkina batean atzeman daitezkeen roulotteek eta zabor mendixkek bakarrik erakusten dute bertan kanpaleku inprobisatu bat dagoela.

Castel Romanon bizi diren ijito gehienak Bosnia eta Herzegovinatik iritsi ziren duela 20 urte. Hori da Hanifa Govorusicen kasua. Gurasoekin karabana batean heldu zen Italiara, eta, geroztik, Castel Romanoko kanpalekua izan da bere etxea. Bertan ezkondu zen, bertan jaio dira haren lau seme-alabak eta bertan banandu da. Hanifak 29 urte ditu, baina hamaika eta bi ikusitakoa da.

Castel Romanon 200 familia bizi dira, argindarrik eta edateko urik gabe. Supermerkaturik hurbilena kanpalekutik ordu erdira dago. Hanifa, seme-alabekin eta amarekin bizi da roulotte batean, eta elkarte txiki bat sortu du Italian jaio diren ijitoei herritartasun italiarra eskuratzen laguntzeko. Izan ere, Castel Romanoko ijito gehienak aberrigabeak dira.

Halere, Hanifaren lana oraindik harago doa, bada, kanpalekuan oso ohikoak diren ezkontza goiztiarren kontrako kanpaina abiarazi du, neskatoen eskolaratzea bultzatuz.

Baina koronabirusak dena geratu du. Osasun krisiak eztanda egin zuenetik, ijitoak ez dira kanpalekutik atera. Beldurtuta daude. Ijitoak bizi diren beste zonalde batzuetan kasu positiboak identifikatu dituzte eta ez dute Castel Romanon gauza bera gertatzerik nahi. Castel Romanoko ijitoek limosna eskatzen dute edo zaborraren banaketa egiteaz arduratzen dira. Konfinamenduak dena geratu du. 

Saio honetako beste atal batzuk