Izan BERRIAlaguna

Zaitun

Zaitun

“Harrotasun italiarra”

Ane Irazabal

Erromako San Giovanni katedraleko enparantza, ezkerreko mugimenduen sinboloa da. Eta ez da gutxiagorako. Bertan egin zituzten alderdi komunistako Palmiro Togliatti eta Enrico Berlinguer liderren hiletak. 

00:00 / 3:39

Entzuteko beste bide batzuk

“Harrotasun italiarra”

Ane Irazabal

2019ko urriak 23

Erromako San Giovanni katedraleko enparantza, ezkerreko mugimenduen sinboloa da. Eta ez da gutxiagorako. Bertan egin zituzten alderdi komunistako Palmiro Togliatti eta Enrico Berlinguer liderren hiletak. Erroman oraindik gogoan dute Berlinguerren azken agurra. 1984ko ekainaren 13an milioi bat pertsona hurbildu ziren San Giovanni enparantzara, lider komunistari agur esatera. Orduz geroztik, sindikatu nagusiek bertan antolatzen dituzte haien elkarteratzeak. San Giovannin ere Langileen Eguneko urteroko kontzertua antolatu ohi dute. Hala, Plaza Gorria deitu izan zaio hamarkada luzez San Giovanniri, eta Kairoko Tahrirren antzeko sinbolo izan da italiarrentzat. 

Baina iragan larunbatean eskuineko alderdiek eta indar xenofoboek ‘okupatu’ zuten. Silvio Berlusconiren Forza Italia, Matteo Salviniren Liga eta Giorgia Meloniren Fratelli D’Italia alderdiek 200.000 pertsona batu zituzten San Giovannin. Lema, argia bezain hutsala: Harrotasun italiarra

Larunbatean geratu zen Italian eskuin muturra boteretik kendu duten arren, oraindik jende andana erakartzeko gai dela eta inkestetan gora eta gora ari dela. Salvinik Pucciniren Nessun Dorma abestiarekin agurtu zituen manifestariak, Italiako lider espirituala balitz bezala. Eta argi esan zuen boterera berriz ere bueltatzen bada, 600.000 etorkin deportatuko dituela. Manifestarien artean, gehienak adineko emakumeak ziren, eta “harekin maiteminduta gaude” esaten zieten kazetariei.

Berlusconi, berriz, aguretuta eta egoera kontrolatzeko gaitasunik gabe zegoen. Baina argi utzi zuen zarata egiten jarraitzeko intentzioa daukala. Arriskutsuena, halere, Giorgia Meloni politikari neofaxistaren diskurtsoa izan zen. Erasokorra eta oso zorrotza. “Lehenik italiarrak”, oihu egin zuen Donald Trumpen lema kopiatuz. Eta bi emakume aipatu zituen: Ama Birjina eta Oriana Fallaci, kazetari eta idazle italiar ospetsua. Fallaci oso ezaguna izan zen bere ekintzailetasun antifaxistarengatik, baina, bizitzaren azken urteetan, New Yorkeko Dorre Bikien aurkako erasoaren ostean, jarrera islamofoboa besarkatu zuen. Eta horri egin zioten aipu eskuin muturreko liderrek, alegia, “Europako eta mendebaldeko balio kristauak aldarrikateari”. Hala, protestak Madrilgo Colon plazako argazki antzekoa utzi zuen, baina jende askoz gehiagorekin


Saio honetako beste atal batzuk