Izan BERRIAlaguna

Zaitun

Zaitun

Kieveko normaltasuna

Ane Irazabal

Ez nuen imajinatzen, baina Kiev hiri ederra da benetan. Zazpi mendixken hiria deitzen diote askok, Erroman bezala, hainbat muinok inguratzen dutelako. II. Mundu Gerran bonbek zeharo suntsitu zuten arren, oraindik antzinako eraikinak mantentzen ditu eta berreraikitzea oso ondo egin zen. Gainera, azken urteetan musika elektronikoaren gotorlekua bilakatu da eta mundu mailako entzuleak eta dj ospetsuak erakartzen ditu. Askoren ustez, 1980ko hamarkadako Berlin berria bilakatu da.

00:00 / 2:40

Entzuteko beste bide batzuk

Kieveko normaltasuna

Ane Irazabal

2022ko otsailak 2

Ez nuen imajinatzen, baina Kiev hiri ederra da benetan. Zazpi mendixken hiria deitzen diote askok, Erroman bezala, hainbat muinok inguratzen dutelako. II. Mundu Gerran bonbek zeharo suntsitu zuten arren, oraindik antzinako eraikinak mantentzen ditu eta berreraikitzea oso ondo egin zen. Gainera, azken urteetan musika elektronikoaren gotorlekua bilakatu da eta mundu mailako entzuleak eta dj ospetsuak erakartzen ditu. Askoren ustez, 1980ko hamarkadako Berlin berria bilakatu da.

Egunotan, Kieveko herritarrekin hizketan, atentzio handia eman dit hirian nabaritu dudan lasaitasuna. Gatazkara ohituta dagoen herrialdea da Ukraina, ez dago zalantzarik, eta batzuk narkotizatuta bezala daudela dirudi. Etengabeko tentsiora ohituta egongo balira bezala. Kieveko kaleetan, gehienek normaltasun hitza errepikatzen dute. Baina zer da normaltasuna ukrainarrentzat? Europako bigarren herrialderik handienak gerra eta okupazio anitz pairatu ditu azken 100 urteetan.

Horregatik, herritar batzuk etxe azpian dituzten aterpeak egokitzen hasi dira. Kieven 6000 babesleku baino gehiago daude eta agureek ondo baino hobeto gogoratzen dituzte sotoak babesteko erabiltzen zituzten garai ez hain urrunak. Metro geltokiak ere bonben aurkako babesleku gisa erabiliko lirateke gerra batek eztanda egingo balu. Baina Kieven gutxik uste dute Moskuren tankeak hiribururaino iritsiko direnik. Badira egoera politikoari arreta handirik jartzen ez diotenak ere. Baina, lasaitasunaren erdian, errealitate batek izugarri arduratu nau. Milizia paramilitarrak, eskuin muturrari loturikoak, entrenatzen ari dira eta benetako armak erabiltzen dituzten. Normaltasunari eusten dion hiriaren azpian badago beste mundu bat indarkeria besarkatu duena eta erradikalizatzen ari dena. Poxpolu kaxa bat balitz bezala, su hartzeko prest dago.

Saio honetako beste atal batzuk