Izan BERRIAlaguna

Zaitun

Zaitun

Konfinamendu hitza ikasi genuen eguna

Ane Irazabal

Italiarrei izugarri gustatzen zaie anglizismoak erabiltzea. Hizkuntza aberatsa daukatela jakin badakite, baina cool-a bilakatu da han eta hemen ingelesezko hitzak esatea. Kazetaritzak eginkizun handia bete du anglizismoen erabilera neurrigabean. Ander Izagirre kazetariak behin esan zidan: “Konturatu zara mundu guztiak capo hitza erabiltzen duela mafiako buruzagien inguruan hitz egiteko, eta italiarrek boss esaten dutela”? Ingelesa oso gutxi menderatzen duen gizarte batean, barregarri suerta daiteke joera hori. Edonola ere, Italian inork ez du betondoa zimurtzen, eta, horregatik, iaz inork ez zuen ezer esan Italiako gobernuak konfinamendu orokorra iragarri eta lockdown hitza erabili zuenean.

00:00 / 3:47

Entzuteko beste bide batzuk

Konfinamendu hitza ikasi genuen eguna

Ane Irazabal

2021ko martxoak 10

Italiarrei izugarri gustatzen zaie anglizismoak erabiltzea. Hizkuntza aberatsa daukatela jakin badakite, baina cool-a bilakatu da han eta hemen ingelesezko hitzak esatea. Kazetaritzak eginkizun handia bete du anglizismoen erabilera neurrigabean. Ander Izagirre kazetariak behin esan zidan: “Konturatu zara mundu guztiak capo hitza erabiltzen duela mafiako buruzagien inguruan hitz egiteko, eta italiarrek boss esaten dutela”? Ingelesa oso gutxi menderatzen duen gizarte batean, barregarri suerta daiteke joera hori. Edonola ere, Italian inork ez du betondoa zimurtzen, eta, horregatik, iaz inork ez zuen ezer esan Italiako gobernuak konfinamendu orokorra iragarri eta lockdown hitza erabili zuenean.

Gaur urtebete bete da Italia osoa mundutik isolatu zenetik. Gogoan dut Giuseppe Conte lehen ministro ohiak konfinamendua iragarri zuen martxoaren 9ko gau hotz hura: “Bihartik aurrera, denak etxera. Ez dugu galtzeko denborarik”. Lehen ministroa urduri agertu zen, izan ere, bazekien errealitatea zirudiena baino arduragarriagoa zela. Ez ziren PCR proba nahikoa egiten eta iparraldeko Lombardia eskualdean jendea etxean eta laguntzarik gabe hiltzen ari zen. Hala, konfinamendu orokorra inposatu zuen munduko lehen herrialdea izan zen Italia birusaren hedapena geratzeko helburuz. Egun bat geroago, Osasunaren Mundu Erakundeak COVID-19a mundu mailako pandemia izendatu zuen, alegia, osasun krisi global bat.

Hasieran, Europaren paria bilakatu zen Italia. Ondoko herrialdeek tristuraz eta distantziaz begiratzen zioten hemen gertatzen ari zenari, haiei inoiz iritsiko ez balitzaie bezala. Ordura arte, Italiak Txinarekin izan zuen jarrera bera nabaritzen genuen. “Zer moduz zaudete, zaindu zaitezte”, esaten zidaten behin eta berriz Euskal Herritik. Nire erantzunak, berriz, etsitasuna islatzen zuen: “zuek zaindu zaitezte, gu iritsi garen egoerara ez iristeko. Birusari aurre hartu eta Italiak egin dituen akatsak ez errepikatu”. Halere, domino efektu bat balitz bezala, Europako herrialde gehienek akats berak errepikatu zituzten.

Orduz gerotik, urte zeharo arraroa izan da. Askotan izan dut etorkizunetik hitz egiten ari nintzenaren sentsazioa. Ardura eta etsipena eguneroko kontua izan dira, eta, gaur, konfinamendua hasi zenetik urtebete betetzen den honetan, hamar urte igaro direla dirudi.

Saio honetako beste atal batzuk