Zaitun

Zaitun

Mediterraneoa

Ane Irazabal

Itsas salbamenduan aritzen den lagun ekintzaile baten deia jaso nuen duela hainbat egun. Larrituta zegoen. “Azken egunetan, etorkinez beteriko ontzien etorrera handitu da eta gero eta baliabide gutxiago daude Mediterraneoan”, esan zidan: “Ukrainako gerrak eztanda egin zuenetik, gobernuz kanpoko erakundeen eta Europako gobernuen laguntza bertara bideratu da. Inor gutxi gogoratzen da Mediterraneoaz”.

00:00 / 3:32

Entzuteko beste bide batzuk

Mediterraneoa

Ane Irazabal

2022ko apirilak 27

Itsas salbamenduan aritzen den lagun ekintzaile baten deia jaso nuen duela hainbat egun. Larrituta zegoen. “Azken egunetan, etorkinez beteriko ontzien etorrera handitu da eta gero eta baliabide gutxiago daude Mediterraneoan”, esan zidan: “Ukrainako gerrak eztanda egin zuenetik, gobernuz kanpoko erakundeen eta Europako gobernuen laguntza bertara bideratu da. Inor gutxi gogoratzen da Mediterraneoaz”.

Ekialde Hurbiletik eta Afrikatik asilo eskatzaileak modu seguruan, hegazkinean, ekartzen dituzten korridore humanitarioak ere gutxitu egin dira aurten. Horretaz ere kexu agertu da nire lagun italiarra. Pasa den negua azken urteetako isilena izan da Mediterraneo itsasoan. Gutxi jakin dugu bertan izan diren erreskateen eta hondoratzeen inguruan. Baina Italiako barne ministerioak emandako datuen arabera, 2022ko urtarrilaren 1etik apirilaren 26ra 9.597 pertsona iritsi dira itsasoa zeharkatu ostean. 2021eko eta 2020ko datuak gainditu dira Italian, halere, patera horien barruan zeuden pertsonen gaineko irudi eta testigantza gutxi iritsi zaizkigu.

Nolanahi ere, badago beste datu bat, askotan, estatistika eta grafikoen artean desagertu egiten dena. Italian lehorreratzen diren etorkin gehienak Saheletik datoz, Sahara azpiko lurralde lehorretik, eta horietako asko migratzaile klimatikoak dira. Atentzio handia ematen dit haiekin hitz egitean ez direlako horretaz jabetzen. Pobreziatik ihes egin dutela, alegia, miseriak inguratu dituela aldarrikatzen dute gehienek. Baina zerk eragin du pobretasun progresibo hori? Piska bat arakatuz gero, erraza da ohartzea horietako asko abeltzain nomadak zirela eta desertifikazio etengabeak haien familien bizimodua errotik aldatu duela. Landa eremutik hiriguneetara alde egin dute, eta handik Europara.

Klima larrialdiaren ondorioz ihes egiten dutenen iritsiera progresiboaren aurrean, Italiak eta beste hainbat herrialdek erabaki berritzailea hartu dute: horiei ere babes politikoa eskaintzea. Datozen urteetako erronkarik handienetakoa izango da larrialdi klimatikoak eragingo duen migrazioa. Hori identifikatzea eta egoerari erantzun bat ematea dira hain begi bistakoak ez diruditen estrategiak. Mediterraneo itsasotik iristen direnen testigantzek badute zer esan. 

Saio honetako beste atal batzuk