Izan BERRIAlaguna

Zaitun

Zaitun

Ostpolitik

Ane Irazabal

Alemaniak gehiago egin beharko luke, Alemania hipokrita hutsa da, Alemaniak Errusiako gasaren eta petrolioaren enbargoa inposatu beharko lituzke. Azken asteetan, gero eta kritika gehiago entzuten dira Berlingo gobernuaren aurka. “Nola bilakatu da Alemania Putinen finantzatzaile?” edo “Alemaniak eskuak odolez zikinduta ditu” dira egunkarietan irakurri ditudan lerroburu gogorretako batzuk. Ukrainako Zelensky presidenteak ere tonua altxatu du eta zera irizten dio: Errusiari inposatutako zigorrek ez dute ezertarako balio, horiei enbargo energetikoa gehitzen ez bazaie.

00:00 / 4:20

Entzuteko beste bide batzuk

Ostpolitik

Ane Irazabal

2022ko apirilak 13

Biziki deigarria egite zait aztertzea nola aldatu den Alemaniako politika duela zortzi hilabete Berlinera iritsi nintzenetik. Angela Merkelen legatua aztertzen genbiltzan orduan, eta inork ez zuen imajinatzen Ukraina ekialdeak duela zortzi urtetik pairatzen zuten gerra herrialde osora zabalduko zenik, horrek beste milaka hildako, 4 milioi errefuxiatu baino gehiago eta Europa hankaz gora jarriko zituzkeenik. Orduan, “mundu askearen lider” gisa agurtu zen Merkel kantzilergotik.
 
Halere, Merkelek beti lehenetsi zituen Alemaniaren interes ekonomikoak Europaren interes politikoen gainetik. Ez zuen harreman onik Putinekin, hori esaten dute, behintzat, bere hurbilekoek. Baina ez zuen bi aldiz pentsatu 2014an Putinekin Nord Stream 2 gasbidearen eraikuntza sinatu zuenean. Itsaso Baltikoa zeharkatuz, Errusiatik zuzenean gasa Alemaniara eramatea zen helburua. Merkelek beti defendatu zuen Nord Stream 2 hitzarmen komertziala zela, ez politikoa, baina AEBak, Ukraina eta Europako Batasuneko kide gehienak aurka izan zituen. Halere, Putinek Ukrainako inbasioa abiarazi ostean, proiektua geldiarazteko agindua eman zuen Olaf Scholzen gobernu berriak eta ezinbestean Alemaniako azken 20 urteetako politika birplanteatzera derrigortu zuen. Lehen aldiz, alemaniarrak ezbairik gabe kritikatzen hasi dira Merkel, Errusiarekiko oraindik menpekoago egin dituelakoan.
 
Baina ze ondorio izango lituzke Errusiari inposatutako enbargo energetikoak Alemanian eta Europan? Alemanian, askorentzat katastrokikoak: ekonomiaren geldialdia, esportazioen frenoa, langabezia, ezegonkortasun politikoa, eskuin muturraren gorakada. Beste aditu batzuek, berriz, jasangarria izango zela aurreikusten dute.  “Nola da posible duela hamar urteko zorraren krisian Alemaniak Europa hegoaldeko herrialdeei sakrifizio erraldoiak inposatzea eta orain sakrifizio horiek bere garin hartzeko prest ez egotea?” Hausnartzen dute hedabide batzuek. Momentuz, Berlingo gobernuak denbora irabazi du eta lortu du Bruselan gasaren eta petrolioaren gaineko bozketa atzeratzea. Ofentsiba amaituko denaren esperantzan edo itxaropen faltsuan.  


Saio honetako beste atal batzuk