Izan BERRIAlaguna

Zaitun

Zaitun

Patruila neonaziak

Ane Irazabal

Sare sozialek piztu dituzte alarma guztiak. ‘III. Bidea’ talde neonaziak Poloniarekiko muga patruilatzeko deialdia bota du, handik Alemaniara iristen saiatzen diren asilo eskatzaileak atzemateko. Haiek ‘ehiza’ hitza erabiltzen dute eta ez dira lehenak. Duela sei urte, paramilitar hungariarrek ere halako patruilak antolatu zituzten Serbiatik Europako Batasunera zeharkatzen saiatzen ziren errefuxiatuak harrapatzeko. Mugan atzematen zituztenean, poliziari deitzen zioten eta batzuetan errefuxiatuak jipoitzen zituzten. Beldurraren estrategia deitzen zioten paramilitarrek.

00:00 / 3:05

Entzuteko beste bide batzuk

Patruila neonaziak

Ane Irazabal

2021ko urriak 27

Sare sozialek piztu dituzte alarma guztiak. ‘III. Bidea’ talde neonaziak Poloniarekiko muga patruilatzeko deialdia bota du, handik Alemaniara iristen saiatzen diren asilo eskatzaileak atzemateko. Haiek ‘ehiza’ hitza erabiltzen dute eta ez dira lehenak. Duela sei urte, paramilitar hungariarrek ere halako patruilak antolatu zituzten Serbiatik Europako Batasunera zeharkatzen saiatzen ziren errefuxiatuak harrapatzeko. Mugan atzematen zituztenean, poliziari deitzen zioten eta batzuetan errefuxiatuak jipoitzen zituzten. Beldurraren estrategia deitzen zioten paramilitarrek.

Alemaniako eskuin muturra inbasioaren ideia xaxatzen hasi da berriz ere, eta arrazoia politikoa da zeharo. Azken bi hilabeteetan gora egin du Bielorrusiatik Poloniara eta handik Alemaniara zeharkatzen saiatzen diren asilo eskatzaileen kopuruak. Ping pong partida baten protagonistak izango balira bezala, errefuxiatuak Minsek eta Bruselaren arteko hika-miken biktimak dira. Alemaniako gobernuak adierazi du iragan abuztutik gora egin duela Poloniako muga gurutzatu eta herrialdera sartzen diren pertsonen kopuruak eta Bielorrusiari botatzen dio errua, argudiatuz, Alexander Lukashenko presidenteak EBa mehatxatu nahi duela hari inposatutako zigorrengatik. Bruselaren esanetan, Lukashenkok ateak ireki die Irakeko, Siriako eta Yemengo errefuxiatuei, bisaturik gabe Minskera abioiez bidaiatzeko, eta, hara iristean, Europako Batasunera zeharkatzera animatzen ditu.

Arazoa da Poloniara iristen direnean, Varsoviako poliziak Bielorrusiara bueltatzen dituela. Poloniak 3 kilometroko esklusio eremua ezarri du mugaldean. Oso gutxik lortzen dute Poloniara zeharkatu eta handik Alemaniara gurutzatzea. Gehienak mugaldean daude kanpatuta, basoetan ezkutatuta. Baina neonaziek inbasioaren inguruan hitz egiten jarraitzen dute eta inork ez ditu haien patruilak geratu.


Saio honetako beste atal batzuk