Izan BERRIAlaguna

Zaitun

Zaitun

Sagar ustelak

Ane Irazabal

2020ko apirilaren lehen astean 13 preso hil ziren Italiako kartzeletan. Albisteak hedabide gehienen lerroburuak bete zituen. Pandemiaren hasieran geunden eta bizi genuen egoerari buruz ez genuen ezer ulertzen. Egun horietan militarren kamioiek hilkutxak eramaten zituzten, ospitaleak kolapsatuta zeuden, Italiak eguneko 900 hildako ofizial zenbatzen zituen, eta, nahasmen horretan, herrialde zabaleko espetxeetan, protestak zabaldu ziren.

00:00 / 3:19

Entzuteko beste bide batzuk

Sagar ustelak

Ane Irazabal

2021ko uztailak 7

2020ko apirilaren lehen astean 13 preso hil ziren Italiako kartzeletan. Albisteak hedabide gehienen lerroburuak bete zituen. Pandemiaren hasieran geunden eta bizi genuen egoerari buruz ez genuen ezer ulertzen. Egun horietan militarren kamioiek hilkutxak eramaten zituzten, ospitaleak kolapsatuta zeuden, Italiak eguneko 900 hildako ofizial zenbatzen zituen, eta, nahasmen horretan, herrialde zabaleko espetxeetan, protestak zabaldu ziren.

Egun horietan oso zaila zen Italiako kaosean zentzu piska bat jartzea. Munduaren amaiera iristen ari zela zirudien. Kartzeletan hala izan zen. Presoek salatu zuten azkenaren azkenak zirela eta gobernuak ezarritako segurtasun neurriek haiei eragiten ez zietela. Espetxeetako gainpopulazioa ez zen arazo berria, baina pandemiari aurre egiteko protokolo serioak falta ziren. Ez zegoen musukorik eta beldurra zabaldu zen barruan lehen kasu positiboak konfirmatu zirenean. Presoek ez zuten kanpotik inolako informaziorik jasotzen, eta, egoera okertzeko, senideen bisitak debekatu zizkieten.

Domani egunkariko Nello Trocchia kazetariak duela zortzi hilabete jaso zituen lehen konfinamenduan Italiako espetxeetan izan ziren tortura kasuen salaketak. Bere lehen artikulua iragan irailean publikatu zen eta erakusten zuen Napoliko Santa Maria Capua Vetere kartzelako protestak indarkeriaz isildu zituztela. Halere, espetxe hartako zaintza kamerek hartutako irudiak publikatu diren arte, albisteak ez du inolako oihartzunik izan. Irudietan ikusten da guardiak presoak jipoitzen, tartean, gurpil aulkian dagoen bat.

Guztira, 52 polizia atxilotu dituzte tortura delituak egotzita eta poliziaren sindikatuak zein justizia ministerioak esan dute “sagar ustelak” direla. Gobernuak ikerketa egingo dela agindu du. Baina bideoak olatu antzeko bat abiarazi du eta beste hainbat kartzelatatik ere salaketak iritsi dira. Hala, olatu beraren eraginez, ofizialki gaindosiaren ondorioz hil ziren 13 presoen izen-abizenak publikatu dituzte, lehen konfinamenduan kaosaren erdian ahaztu ziren heriotzak iker daitezen.

Saio honetako beste atal batzuk