Alderdi baten erregistrorako pausoak eta hauteskunde epeak

Espainiako Gobernua

• Barne Ministerioa. Sortu alderdi berriak Espainiako Barne Ministerioaren erregistroan izena eman zuen otsailaren 9an. Barne Ministerioak erregistrorako pausoak moztu egin ditu, eta Fiskaltzari eman dizkio estatutuak, azter ditzan.

Fiskaltza eta Estatuaren abokatua

• Inpugnatu edo ez. Erregistro eskaera Auzitegi Gorenean inpugnatu edo ez inpugnatzeko aukera daukate. 20 eguneko epea dute. Fiskaltzak gaur esan du martxoaren 11 baino lehen sartuko duela inpugnazioa.

Auzitegi Gorena

• Tramitazioa. Fiskaltzak edota Estatuaren abokatuak igorritako inpugnazioa jasotzen badu, alegazioak aurkezteko epea ireki behar du. Alderdi berriak hamar eguneko epea izango luke.

• Auzi saioa. Alde guztiek argudioak azal ditzaten auzi saioa egin beharko luke.

• Erabakia. Auzi saioa egin eta egun gutxira iritsiko litzateke. Hauteskunde deialdia baino lehen erabakitzeko denbora dago.

Hauteskunde epeak

• Alderdien parte-hartzea. Hauteskundeetan aurkeztu ahal izateko alderdiek eta alderdien arteko koalizioek lehendabizi ordezkari orokor bat izendatu behar dute Hauteskunde Batzorde Zentralaren aurrean. Hauteskunde deialdia egin eta bederatzi egun bete baino lehenago egin behar dute, Hauteskunde Legearen arabera. Ordurako, jakina, alderdiak erregistratuta egon behar du. Udal eta foru bozak 2011n maiatzaren 22an izango direnez, tramite hori martxoaren 29tik apirilaren 6ra bitartean bete beharko da. Alderdi berria hauteskundeetan aurkeztu ahal izateko, apirilaren hasierarako legeztatuta egon beharko da.

• Zerrendak. Deialdia egin eta hamabosgarren egunetik 21. egunera bitartean aurkeztu behar dituzte zerrendak alderdiek, koalizioek edo hautesle elkarteek (apirilaren 13tik 18ra). Fiskaltzak eta Estatuaren abokatuak inpugnatu ahal dituzte, eta Auzitegi Gorenari eskatu baliogabetzeko.