Athleticek 5-1 galdu du eta adio esan dio Europari; Osasuna 2-1 galtzaile

Athleticek 5-1 galdu du gaur gauean Real Madrilen aurka, Espainiako Lehen Mailako 37. jardunaldian, eta adio esan dio Europako Ligari -orain lau puntura baitu-. Lehen zatia bana bukatu dute (Ronaldok 1-0ekoa 22. minutuan, Yestek banakoa 40.ean), Athleticek ondo eutsi dio 77. minutura arte, baina handik aurrera gol sorta jaso du (Higuain, Sergio Ramos, Benzema, Marcelo).

Osasunak, berriz, 2-1 galdu du Espanyolen zelaian. Vadoczek 0-1ekoa jarri du 5. minutuan. Aurkariek buelta eman diote partidari: Forlin eta Osvaldo golegile 49 eta 51. minutuetan. Osasuna 13. dago, 42 punturekin; lehengo jardunaldian lortu zuen salbazioa.

Azkeneko jardunaldian: Athletic-Deportivo, Osasuna-Xerez.

Bartzelonak segitzen du lider -2-3 garaile gaur Sevillaren zelaian-, eta datorren asteburuan etxean Valladolidi irabazten badio, txapeldun. 96 puntu dauzka. Real Madrilek 95 -Malagan ariko da-. Valladolidek eta Malagak jokoan izango dute salbazioa.