Espainiako Kopa Donostiara eraman du Bera Berak, atzo finalean Rocasari irabazita. 25-24 nagusitu ziren donostiarrak, eta hirugarrenez irabazi dute kopa; aurretik, 2007an eta 2009an irabazi zuten.
Defentsa lanetan fin arituta lortu zuen garaipena Bera Berak. Atzetik hasi zen markagailuan, baina atsedenaldirako aurretik zen, azken minutuetan lau gol bata bestearen atzetik sartuta; 14-10. Indartsu ekin zion bigarren zatiari Rocasak, 18-19 aurretik jartzeraino.
Estu joan ziren azken minutuak, baina Darly Zoqbi Bera Berako atezaina erabakigarria izan zen; hiru penalti gelditu zituen azken hamar minutuetan, eta finaleko jokalaririk onena izendatu zuten. Ziarsolok, berriz, Bera Beraren azken bi golak sartu zituen, eta, hala, kopa Donostiara eraman.
