Bitartekaritzako webguneak, susperraldian den negozio eredua

Elkarlanerako kontsumoko enpresatzat du bere burua Airbnb-k. Gauzak partekatzea sustatzen du eredu horrek, ezezagunen arteko konfiantzan oinarrituta: batek irabazten badu, besteak ere bai. Halakoak asko ugaritu dira azkenaldian. Turismoari lotutakoen artean, Alterkeysek harremanetan jartzen ditu bidaiariak etxejabeekin, oporretarako etxe osoak aloka ditzaten; Nnokek etxe trukea sustatzen du; Sherpanpyditk-ek eta Triperonek bisitariei aukera ematen diete tokiko jendearekin harremanetan jartzeko eta haien ahotik jasotzeko toki interesgarrienen berri; Blablacarrek autoa partekatzeko eskaintzak biltzen ditu; Socialcarrek autoen alokairua eta trukea errazten die partikularrei. Azkenik, jatea eta edatea maite dutenentzat dago pentsatuta Meetmeals, sukaldari profesionalak eta amateurrak jartzen baititu harremanetan esperientzia gastronomiko berezi bat izan dezaten.