Zuzenbidean doktorea da Eneko Compains Silva (Iruñea, 1981), eta, bere tesian, Venezuela, Bolivia eta Ekuadorko prozesu konstituziogileak alderatu zituen, 2016an. Gaur egun, Konstituzio Zuzenbideko eskolak ematen ditu EHU Euskal Herriko Unibertsitatean.
Hainbat liburutan parte hartu du: besteak beste, Pablo Iglesiasek koordinaturiko Ganar o morir liburuan (Irabazi ala hil) eta iaz argitaraturiko Nazioarteko harremanetarako hamalau giltza-hitz lan kolektiboan agertu dira hark idatzitakoak. Horrez gainera, artikulu ugari ere plazaratu ditu hainbat agerkaritan.
Politikoki, Sortuko kidea da, eta, 2017an, alderdi politiko horretako Nazio Kontseiluko kide hautatu zuten.
