Espainiarekin errespetuzko harremanak eta Europan ahots propioa proposatu ditu Ibarretxek

Europako Batasunean ordezkari propioak izatea beharrezkotzat jo du Juan Jose Ibarretxe Eusko Jaurlaritzako lehendakariak bere proposamenean. Europako Batasunean bakarrik ez, baita nazioartean ere, "batik bat Euskadi eta bere eskubideei dagozkion kontuetan". Espainiarekin izango dituen harremanei dagokienez, berriz, "berdintasunean eta errespetuan" oinarrituko direla adierazi du eta "gatazkarik gabekoak" izan beharko dutela.

Euskadik Europako Batasunean toki eta ahots propioa beharrezkotzat jo du Ibarretxek, "Euskadiren interesak behar bezala defendatzeko". Espainiakoarengandik aparte, ordezkari propioak izango ditu, hortaz, Euskadik Europan, eta baita nazioarteko erakundeetan ere.

Horrek ez du esan nahi, halere, lehendakariaren ustez, Espainiarekin izan beharreko harremanak gatazkatsuak izan behar dutenik. "Adiskidetasunean, errespetuan eta berdintasunean oinarrituko dira Espainiarekiko harremanak", esan zuen lehendakariak. Hori bermatzeko batzorde eta erakunde desberdinak sortzea proposatu du Ibarretxek, "gatazkaren bat sortuz gero konponbideak aurkitzeko".