Genero indarkeriak. hildako andreak, kasuz kasu

Aurten hildako zazpi emakumeen kasuak, kronologikoki:

ELENA CAL

•2010-01-17. Labankadaz hil zuten Elena Cal , Tolosan (Gipuzkoa). 45 urte zituen eta udalerri horretako San Frantzisko elizaren ondoko etxola batean bizi zen orduko bikotekidearekin eta bikotekide ohiarekin batera. Bi gizonezkoak atxilotu zituzten hasiera batean, baina aurrerago Calen bikotekidea libre laga zuten.

AMELIA SANCHEZ

•2010-02-08. Ustez semeak hil zuen Amelia Sanchez 65 urtekoa, Barakaldon (Bizkaia). Ertzaintzaren arabera, ama-semeek eztabaida izan zuten, eta semeak labankada bat eman zion amari. Zenbait iturrik esan zuten semeak aurretik hainbat salaketa zituela: bikotekide izandakoari eta amari erasotzea egozten zioten.

ISABEL VELEZ

•2010-02-19. Ustez semeak hil zuen, Lasarte-Orian (Gipuzkoa); 48 urte zituen. Ertzaintzak jakinarazi zuen semeak arazo psikiatrikoak zituela, eta amarekin liskarrak maiz zituela. Familiarengandik urruntzeko agindua ere ezarri zioten mutil gazteari. Lasarte-Oriako Udalak neurriak eskatu zituen buruko eriak taxuz artatzeko.

AMELIA AMAYA

•2010-07-25. Urruntze agindua apurtu eta Amelia Amaya hil zuen ustez bikotekideak, Bilboko Txurdinaga auzoan. Gizonarekin batera haren anaia eta ama ere atxilotu zituzten, delitua ezkutatzen saiatzea egotzita.

ANNIE FROMENT

•2010-09-20. Miarritzen(Lapurdi) hil zuten. Ustez 30 urte lehenago bikotekide izandako gizonezkoak hil zuen, tiroz. Gero hark bere buruaz beste egin zuen.

KRISTINE BOSQUE

•2010-11-28. 65 urteko Arbonako (Lapurdi) emakume hau azaroaren 21ean eraman zuten Baionako erietxera, oso larri, eta handik astebetera hil zen. Autopsiak erakutsi zuen litekeena zela estrangulatuta hil izana. Senarra handik egun batzuetara atxilotu zuten, hilketa leporatuta.

CRISTINA ESTEBANEZ

•2010-12-06. Barakaldon (Bizkaia) hil zuten, etxean. Estebanez orduko bikotekidearekin zegoen, eta bikotekide ohia agertu zen; ustez biei oldartu zitzaien eta labanaz eraso zien. Estebanez bertan hil zen. Bikotekidea, berriz, larri zaurituta erietxera eraman behar izan zuten. Ustezko hiltzaileak Estebanezengandik urruntzeko agindua zuen.