1999. urtetik da indarrean Venezuelako Konstituzioa eta, bertan zehazten denez, Nicolas Maduro presidenteordeak hauteskundeetara deitu beharko du orain. 233. artikuluaren arabera, presidenterik ez badago -heriotza, dimisioa, kargugabetzea edo ezgaitasun fisiko edo psikologikoa aipatzen ditu aukeren artean-, hauteskundeetara deitu behar da 30 egun baino lehen.
Espero dute hiru hilabete baino lehenago egitea presidente berria izendatzeko bozak. Konstituzioaren arabera, Asanblea Nazionaleko presidenteak -hots, Diosdado Cabellok- bete behar du kargua presidente berria izendatzen duten arte.
Gainera, Nicolas Madurok presidente izateko hautagaitza aurkeztu nahi badu, presidenteorde kargua utzi beharko du. Chavezek hura izendatu zuen haren ordezko.
