Jaurlaritzaren aburuz adierazpenak atea zabaltzen dio "etorkizuneko irtenbideak aurkitzeko eztabaida politikoari"

Jose Luis Rodriguez Zapatero Espainiako Gobernuko presidenteak ETArekin hizketan hasiko dela iragarri du gaur. Eusko Jaurlaritzak "positibotzat" jo du Zapateroren adierazpena. Miren Azkarate Eusko Jaurlaritzako bozeramaileak azaldu du Jaurlaritzaren ustez adierazpen honek atea zabaltzen diola "etorkizuneko irtenbideak aurkitzeko eztabaida politikoari".

Era berean, Espainiako Gobernuko presidenteak "orain arte bezala", lehendakariaren eta Eusko Jaurlaritzaren konpromisoa izango duela berretsi du Azkaratek: "bake iraunkor, unibertsal eta atzerabiderik izango ez duena lortzeko".

Eusko Jaurlaritza bat etorri da Zapaterok adierazpenean azpimarratu duen puntu batekin: "Irtenbide politikoak aurkitzeko bidea, euskal indar politikoei dagokie, eta haiei bakarrik", azpimarratu du Azkaratek.

"Eta euskal gizarteari dagokio demokratikoki erabakitzea nolako etorkizuna nahi duen. Eta erabaki hau errespetatu beharko dute, orain arte ez bezala". Gernikako Estatutua eta Eusko Legebiltzarrak onartutako Estatutu Politiko Berria aipatu ditu Eusko Jaurlaritzako bozeramaileak.