Juanito Oiarzabalek Annapurna igo du gaur, bere 24. zortzimilakoa

Oh Eun-Sun korearra ez da Annapurnako gailurrera gaur iritsi den bakarra, Juanito Oiarzabalek (Gasteiz, 1956) ere 8.091 metroko gailur hori zapaldu baitu, Euskal Herrian 12:15ak zirela. Gaurkoarekin 24 zortzimilako egin ditu -batzuk hiru aldiz igoak ditu- eta munduko hamalau mendi garaienak gehienetan igo dituen mendizalea izaten jarraitzen du.

Hamalau zortzimilakoak birritan igotzen aurrena izan nahi du Oiarzabalek -denak behin behintzat igoak ditu- eta, horretarako, sei mendi igo behar ditu oraindik. Udaran Nanga Parbatera iristeko asmoa dauka eta udazkenean Shisha Pangmako igoerarekin saiatuko da.