Mendeurreneko festaren egitaraua

19:00. Añorgako erraldoiak eta buruhandiak ibiliko dira Anoeta estadioaren inguruan, baita batukada eta txaranga ere. Bi makillaje gune jarriko dituzte, haurrek aurpegia txuri-urdinez margotzeko. Etorkizunean Realeko denda izango den gunean salgai jarriko dituzte mendeurrena dela-eta ateratako produktuak. Estadioaren inguruan argazkilariak ibiliko dira, egin asmo duten Realaren Museorako irudiak ateratzen.

20:00. Kalejira abiatuko dute Bulebarretik. Hernani kalea, Askatasunaren hiribidea, Urbieta kalea, Antso Jakitunaren hiribidea eta Madrid hiribidea igaroko ditu. Arazo gutxiago sortzeko, bide bakarra erabiliko dute. Antolatzaileek dei egin dute Realeko jantziak eta banderak eramanda kalejiran parte hartzera.

21:00. Kalejira Anoetara iritsiko da, eta ekitaldien aurkezpen ofiziala egingo dute.

21:15. Datorren denboraldiko taldearen aurkezpen ofiziala. Jokalariak banaka-banaka aterako dira zelaira, megafonia bidez izena esan ahala. Denak zelaian direlarik, denboraldiko argazki ofiziala egingo dute.

21:25. Realeko eta Real Madrileko jokalariak berotzera aterako dira. Bitartean, taldearen ehun urteetako irudirik esanguratsuenekin osatutako bideoa emango dute markagailuaren berri emateko pantailetan.

21:35. Union Artesanaren danborrada. Realarekin eta Donostiarekin zerikusia duten abestiak joz buelta emango diote Anoeta estadioari.

21:45. Mendeurreneko banderaren omenaldia. Kalejiran ekarritako bandera zelai erdian jarriko dute 100 haurrek, eta han utziko dute partida hasi arte.

21:50. Mendeurrenerako egindako abestia abestuko dute Mikel Erentxunek, Andoni Egañak, Gose taldeko Inesek, eta Gozategi-ko Asierrek. Zale guztiek batera abesteko, letra utziko dute eserleku bakoitzean.

21:55. Partida jokatuko duten jokalarien irteera. 120 metroko pankarta zabalduko dute, eta 3.375 globo bota -Realak Anoetan sartutako gol bakoitzeko globo bat-.

21:59. Minutuko isilaldia, hildako zaleen, arduradunen eta jokalarien omenez.

22:00. Partidaren hasiera.

22:45. Atsedenaldia. 1.000 baloi botako dizkiete zaleei.

23:55. Partidaren amaiera. Une onenei begiratua.

00:00. Anoetako argiak itzali, eta, txinparta suzirien argiaz, Zorionak Zuri kantatuko dute.