EAJko Gipuzkoako eledunak "kaosa" sortzea eta "muga guztiak gainditzea" egotzi dio Bilduri, Radio Euskadin emandako elkarrizketan. Europako Inbertsio Bankuak Gipuzkoari "etekin ugari" ekarri dizkiola ere esan du. Aldundiak atzo jakinarazi zuen errauste planta betiko baztertzea proposatuko diola hondakinen partzuergoari.
Olanok salatu du Gipuzkoako Aldundia "aurre egiten" ari zaiela erakunde guztiei, "baita Gipuzkoako herritarrei ere", eta atez ateko sistema "inposatzen" ari direla kritikatu du. Olanoren arabera, errauste plantaren proiektua desegiteak erantzukizun judizialak izan ditzake; hori dela eta, bide guztiak zabalik utzi ditu: "Ez gara geldirik geratuko".
Olanoren arabera, lurraldeko enpresen egoera "kritikoa" izaten ari da, babesa behar dute, eta aldundiak ez du "aktiboki" ezer egiten: "Gipuzkoa oso indartsua da ekonomikoki, nahiz eta Bilduren gobernuak eskurik ez hartu". Ekonomia arloan agendarik ez izatea "arduragarria" da, Olanoren ustez. "Ezinbestekoa da erakundeen arteko elkarlanari eustea", gaineratu du.
Bazkaria hizpide
Europako Inbertsio Bankuko ordezkariekin izandako bazkaria dela eta, EAJren eledunak nabarmendu du "ahalegin handia" egin dutela haiekin harreman ona izateko, horrek "etekin ugari" ekarri dituelako Gipuzkoarentzat. Olanok uste du Gipuzkoako Aldundiak hori "zikindu" nahi duela: "Tamalez, ondorioak ekarriko ditu, izen ona galtzea ekarriko du Gipuzkoako erakundeentzat, eta oso zaila izango da horri buelta ematea".
