Otegiren abokatuak kereila sartuko du gaur Noticias Taldearen aurka

Arnaldo Otegi ezker abertzaleko kidearen abokatu Jone Goirizelaiak iragarri du gaur arratsaldean Noticias Taldearen aurkako kereila sartuko duela, talde horretako egunkariek haren ustezko gutun bat argitaratu zutelako abenduaren 22an. Otegi urritik preso daukate -Navalcarnero espetxean dago orain-, eta egunkariek haren intimitate eskubidea urratu izana salatuko du Goirizelaiak.

Gainera, abokatuak jakinarazi du Noticias Taldeko kazetek gezurra esan zutela ustezko eskutitzeko edukiaz. Egunkari haiek zioten ezker abertzaleko kideak ETAren indarkeria defenditzen dutenak kritikatu zituela gutunean. "Otegirekin hitz egin dut eta berak esan dit ez dela egia berak hori idatzi zuenik", adierazi dio Goirizelaiak gaur Euskadi Irratiari.