Espainiako jarduneko justizia ministro Rafael Catalak adierazi du "onartezinak" direla Jose Ricardo de Prada Espainiako Auzitegi Nazionaleko epaileak Tolosan eginiko adierazpenak, eta dei egin dio torturak salatzera edo, hala egin ezean, Espainiako Segurtasun Indarrei "barkamena" eskatzera.
Tolosan mahai inguru batean izan zen De Prada , Iñigo Iruin abokatuarekin eta Carmen Lamarca Zigor Zuzenbideko katedradunarekin batera, Garbiñe Biurrun gidari zutela. Han honela esan zuen, hitzez hitz: "Torturak egon dira, modu argian. Nire bizitza profesionalean susmo argiak izan ditut. Auzitegietan ez zaio erantzun horri".
"Gizon hau iradokitzen ari bada, edo zuzenean esaten, Espainiako Segurtasun Indarrek delituren bat egin dutela, horren berri duelako izango da. Salatzeko betebeharra urratzen ari da, delitu baten berri duenak salaketa aurkeztu beharko lukeelako", adierazi du Catalak.
