Lance Armstrong

Taldea: Us Postal Service
Adina: 32 urte
Jaioterria: Austin, Texas (AEB)
Debuta: 1992
2004ko garaipenak: 5
Garaipenak Tourrean: Bost Tour eta 16 etapa

Lance Armstrong da, Jan Ullrichekin batera, Tourra irabazteko faborito nagusia. Irtengo diren guztien artean horiek biek bakarrik erakutsi dute, oraingoz, Tourra irabazteko gaitasuna.
Armstrongek aldaketa zenbait egin ditu aurten bere prestakuntzan. Ohi baino lehenago hasi zuen denboraldia Algarveko Itzulian, Portugalen (otsailean), non erlojupekoa irabazi baitzuen. Ondoren, Murtziako itzulia (23.), Nazioarteko Kriteriuma (3.), Georgiako Itzulia (garaipena eta etapa bi), Languedoc Roussillongo Itzulia (6. eta etapa bat) eta Dauphine Libere korritu ditu. Guztira 31 egunetan korritu, iaz baino gutxixeago, freskoago heltzeko Tourraren hirugarren astera, segur aski.
Iazko Tourreko estutasunak eta Dauphinen izan zuen ibilera ohi baino makalagoak bere gainbehera iragarri bide dute, baina, hala ere, tentuz aritu behar da. Onena ez bada, onenetakoa da oraindik.

Jan Ullrich

Taldea: T-Mobile
Adina: 30 urte
Jaioterria: Rostock (Alemania)
Debuta: 1995
2004ko garaipenak: 3
Garaipenak Tourrean: Tour bat (1997) eta 7 etapa.

Bigarren egiteaz zeharo asperturik (bost aldiz!) aurten berriro podiumeko lehenbiziko postua lortzeko egin du lan. Bere ohiko prestaketa egin du alemaniarrak. Denboraldia Murtziako Itzulian hasi zuen (martxoan, 71. sailkatu zen) eta hantxe baino ez zuen bat egin Lance Armstrongekin.
Haren atzetik, eta entrenamendu aldi luzeak tartekatuz, Kataluniako Setmanan (92.), La Sartheko zirkuituan (erretiratu egin zen) Alemaniako Itzulian (7.) eta Suitzakoan (garaipena eta etapa bi) doitu ditu bere dohain aberatsak. Egun bateko beste proba pare bat gehituz gero, bere egutegian 33 karrera egun ageri dira.
Behetik gorako prestaketa egin du Ulrrichek, urteroko legez, baina Suitzako Itzulia irabazi arren, bere onenetik urrun samar ibili da orain arte. Sobera izan dituen kiloak izerdiz urtu, eta ibilbidea lagun ez izan arren, azken astera sasoi betean helduko da.

Iban mayo

Taldea: Euskaltel-Euskadi
Adina: 26 urte
Jaioterria: Igorre (Euskal Herria)
Debuta: 2000
2004ko garaipenak: 8
Tourreko garaipenak: Etapa bat (6. iaz)

Zeresan gehien eman duen ziklista da Igorrekoa. Harri eta zur utzi du mundua, hain izan baitira handiak berak emandako erakustaldiak.
Murtziako Itzulian jarri zuen abian denboraldia (25.) eta handik aurrera beti aurreneko hamarretan sailkatu da: zazpigarren Kataluniako Setmanan, bigarren Euskal Herriko Itzulian, eta aurrena Alcobendasko Klasikoan, Narancoko Igoeran, Asturiasko Itzulian eta Dauphine Liberen. Armstronek bezala 31 lasterketa egun egin ditu.
Zalantzarik gabe, bere aurkari guztiek baino arrakasta gehiago lortu eta, segur aski, sasoiz ere hobeto ibili da, baina, horrek berak kalterik ekar lekioke Tourreko azken astean, pasatuxea hel daiteke-eta. Halakorik gertatuko ez balitz Tourra irabaz dezake, ibilbidea alde duelako, inoiz izatekotan. Asteazkeneko taldekako erlojupekoan ez du atzerapen handiegirik izango eta kronoigoera du bere alde.

Tyler Hamilton

Taldea: Phonak
Adina: 31 urte
Jaioterria: Marblehead (AEB)
Debuta: 1995
2004ko garaipenak: 2
Tourreko garaipenak: Etapa bat (4. iaz)

Azken bi denboraldiotan Iban Mayorekin orpoz orpo ibili den ziklista da Hamilton. Iaz, Euskal Herriko Itzulian Mayoren atzetik sailkatu zen, baina aurretik Lieja-Bastogne-Lieja klasiko handian. Tourrean, bizkaitarra baino gehiago izan zen, batez ere Baionako etapa gogoangarriari esker.
Aurten, ordea, atzetik ibili da, orain arte. Atzetik izan zen Dauphineko bi erlojupekoetan, baita sailkapen nagusian ere. Beraz, ondo bidean, Tourrean ere haren inguruan ibil daiteke eta Igorreko mutila irabazteko gai bada, Hamilton ere podiumean sartzeko moduko txirrindularia da, gutxienez.
Arazo larri bat du Hamiltonek, teknikoki oso txarra da, oso. Bizikletan berandu hasi zen, eskiatzailea baitzen gaztetan, baina erori, ornoak hautsi eta ondoren hasi zen bizikletan, 19 urte zituela. Azken bi urteotan sei aldiz erori da, eta lepauztaietan hezur baino burni gehiago dauka. Erortzen ez bada, argi.

Roberto Heras

Taldea: Liberty Seguros
Adina: 30
Jaioterria: Bejar (Espainia)
Debuta: 1995
2004ko garaipenak: 1
Tourreko garaipenak: - (5. 2000. urtean)

Lance Armstrongen zumitzetik ihesi, Liberty Seguros taldeko aginte makila du orain eskuan bere betiko ametsa betetzeko: Tourra irabaztea. Hori oraingoz horixe da, ametsa, baina podiumean izan liteke lehenbizikoz. Lehia horretan ibil daiteke, behintzat.
Eskalatzaile orok izan ohi duen arazoari, erlojupekoari, irtenbidea eman dio lehenbiziko kolpean Manolo Saiz zuzendariaren eskutik. Euskal Bizikletako erlojupekoan bigarren sailkatu zen, eta ia 50 kilometro orduko abiadan ibili zen. 60 kilo eskas duen ziklista batek halakorik egitea harrigarria da. Tourreko azken erlojupekoan halako proportzioan jardungo balu, asko du bere alde, teorian, beste etapa erabakigarrietan ondo moldatuko da-eta.
Bestalde, fresko helduko da (26 bat egunetan korritu du) eta behetik gorako prestaketa egin du: 37. Setmanan, 44. Itzulian, 5. Alcobendasen, 13. Asturiasen eta aurrena Euskal Bizikletan.